પંજાબની સંગરુર અદાલતે કોંગ્રેસ અધ્યક્ષ મલ્લિકાર્જુન ખડગે સામે 15 હજાર રૂપિયાનો જામીનપાત્ર વોરંટ જારી કર્યો છે. કોર્ટે તેમને 19 સપ્ટેમ્બર, 2026ના રોજ વ્યક્તિગત રીતે હાજર રહેવાનો આદેશ આપ્યો છે. અદાલતના નિર્દેશ મુજબ ખડગેએ હાજર રહી જામીનની પ્રક્રિયા પૂર્ણ કરવાની રહેશે.

આ કાર્યવાહી વર્ષ 2023 દરમિયાન કર્ણાટક વિધાનસભા ચૂંટણીમાં આપવામાં આવેલા એક નિવેદનને લઈને કરવામાં આવી છે. સંગરુરના રહેવાસી અને બજરંગ દળ સાથે સંકળાયેલા હિતેશ ભારદ્વાજ દ્વારા દાખલ કરાયેલી ફરિયાદના આધારે કોર્ટે આ કેસમાં આગળની કાર્યવાહી હાથ ધરી છે.

ફરિયાદ મુજબ ચૂંટણી પ્રચાર દરમિયાન મલ્લિકાર્જુન ખડગેએ બજરંગ દળની સરખામણી પોપ્યુલર ફ્રન્ટ ઓફ ઇન્ડિયા (PFI) સાથે કરી હતી અને કોંગ્રેસની સરકાર બનશે તો બજરંગ દળ પર પ્રતિબંધ મૂકવાની વાત કરી હતી. આ નિવેદનને આધારે તેમની સામે ફરિયાદ નોંધાવવામાં આવી હતી.

માહિતી અનુસાર શરૂઆતમાં આ કેસને નાગરિક પ્રકૃતિનો માનવામાં આવ્યો હતો, પરંતુ હવે અદાલતે તેને ફોજદારી પ્રકૃતિનો મામલો ગણાવી આગળની કાર્યવાહી શરૂ કરી છે. કોર્ટે સ્પષ્ટ કર્યું છે કે જો મલ્લિકાર્જુન ખડગે 19 સપ્ટેમ્બરની સુનાવણી દરમિયાન વ્યક્તિગત રીતે હાજર નહીં રહે તો તેમના વિરુદ્ધ બિનજામીનપાત્ર વોરંટ (NBW) જારી કરવામાં આવી શકે છે.