અમેરિકન ડિપાર્ટમેન્ટ ઓફ હોમલેન્ડ સિક્યુરિટી (DHS)એ માહિતી આપી હતી કે કોલંબિયા યુનિવર્સિટીના એક ભારતીય ડોક્ટરલ વિદ્યાર્થિની CBP હોમ એપનો ઉપયોગ કરીને જાતે જ ડિપોર્ટ થઈ ગઈ છે. તેના વિઝા રદ કરવામાં આવ્યા હતા કારણ કે તે હમાસને સમર્થન આપતી હતી. કોલંબિયા યુનિવર્સિટીમાં શહેરી આયોજનનો અભ્યાસ કરતી વિદ્યાર્થિની રંજની શ્રીનિવાસન F-1 સ્ટૂડન્ટ વિઝા પર અમેરિકા ગઈ હતી. 

ઉલ્લેખનીય છે કે  5 માર્ચ 2025ના રોજ અમેરિકાના ડિપાર્ટમેન્ટ ઓફ સ્ટેટે રંજન શ્રીનિવાસનના વિઝા રદ કર્યા હતા. ત્યારબાદ તેણે 11મી માર્ચ 2025ના રોજ CBP હોમ એપનો ઉપયોગ કરીને જાતે જ ડિપોર્ટ થઈ ગઈ હતી અને તેનો વીડિયો પણ બનાવ્યો હતો.

અમેરિકાના હોમલેન્ડ સિક્યુરિટી સેક્રેટરી ક્રિસ્ટી નોએમે દેશનિકાલ પર કહ્યું કે, 'અમેેેેેેેેરિકામાં રહેવા અને અભ્યાસ કરવા માટે વિઝા મેળવવો એ એક વિશેષાધિકાર છે અને જો તમે હિંસા અને આતંકવાદની હિમાયત કરી રહ્યા છો, ત્યારે તમે આ વિશેષાધિકારને લાયક નથી અને તમારે આ દેશમાં હવે ન રહેવુંજોઈએ. કોલંબિયા યુનિવર્સિટીના આતંકવાદ સમર્થકોમાંથી એકને જાતે જ ડિપોર્ટ માટે CBP હોમ એપ્લિકેશનનો ઉપયોગ કરતી જોઈને મને આનંદ થયો.'

જ્યારે બીજી એક ઘટના પણ ચર્ચામાં છે. વેસ્ટ બેન્કની અન્ય એક પેલેસ્ટિનિયન વિદ્યાર્થિની લેકા કોર્ડિયાની નેવાર્કના અધિકારીઓ દ્વારા તેના F-1 સ્ટૂડન્ટ વિઝાની મુદત પૂરી થયા પછી પણ ત્યાં રહેવા બદલ ધરપકડ કરવામાં આવી હતી. હાજરીના અભાવે તેના વિઝા 26મી જાન્યુઆરી, 2022ના રોજ સમાપ્ત થઈ ગયા હતા.