ઈરાન યુદ્ધને પગલે ઊર્જાના ભાવમાં થયેલા વધારાની અસર હવે બ્રિટનના જીવનજરૂરિયાતના ખર્ચ પર જોવા મળી રહી છે. ઓફિસ ફોર નેશનલ સ્ટેટિસ્ટિક્સ (ONS)ના આંકડા મુજબ, જુલાઈમાં બ્રિટનનો ફુગાવો વધીને 2.9% થયો હતો, જ્યારે જૂનમાં તે 2.6% હતો. આ દરમિયાન બ્રિટિશ ગ્રાહકોએ જુલાઈમાં 4 વર્ષમાં ઉનાળાના ઊર્જા ચાર્જમાં સૌથી મોટો વધારો અનુભવ્યો હતો.

અમેરિકા-ઈઝરાયેલ અને ઈરાન વચ્ચેના યુદ્ધથી વૈશ્વિક ઊર્જા બજારમાં ભારે ઉથલપાથલ સર્જાઈ હતી, જેના કારણે બ્રિટનમાં ઊર્જાના ભાવ પર અસર પડી હતી. બીજી તરફ, સિટી અર્થશાસ્ત્રીઓએ પણ ગ્રાહક ભાવ સૂચકાંક (CPI) આધારિત ફુગાવો જુલાઈમાં 2.9% રહેવાની આગાહી કરી હતી. આમ, સત્તાવાર આંકડો અર્થશાસ્ત્રીઓના અનુમાન પ્રમાણે જ રહ્યો છે.

મોંઘવારીમાં થયેલા આ વધારા વચ્ચે બેન્ક ઓફ ઈંગ્લેન્ડ માટે પણ આગામી નિર્ણય પડકારરૂપ બન્યો છે. મધ્ય પૂર્વની અનિશ્ચિત સ્થિતિને ધ્યાનમાં રાખીને બેન્ક આવતા મહિનાથી વ્યાજદરમાં વધારો કરવો કે નહીં તે અંગે વિચારણા કરી રહી છે. જોકે, રોજગાર બજારમાં મંદીના સંકેતો, નોકરીની ખાલી જગ્યાઓમાં ઘટાડો અને ખાનગી ક્ષેત્રમાં પગાર વૃદ્ધિ ધીમી પડવાથી વ્યાજદર વધારવાનો નિર્ણય મુશ્કેલ બની શકે છે.

આ પહેલાં 2026ના પ્રથમ 6 મહિનામાં બ્રિટનની અર્થવ્યવસ્થાએ G7 દેશોમાં સૌથી ઝડપી વૃદ્ધિ નોંધાવી હતી. ગયા વર્ષે ફુગાવો 3.8%ની ટોચે પહોંચ્યા બાદ તેમાં ઘટાડાના સંકેતો જોવા મળ્યા હતા અને ઈરાન યુદ્ધ ફેબ્રુઆરીના અંતમાં શરૂ થયું તે પહેલાં ફુગાવો લગભગ 2% સુધી ઘટવાની શક્યતા વ્યક્ત કરવામાં આવી હતી. જોકે, ઊર્જાના ભાવમાં તાજેતરના વધારાને કારણે હવે બ્રિટનમાં ફુગાવાનો દબાણ ફરી વધ્યો છે.