નેપાળમાં એક ભયાનક બસ અકસ્માત થયો છે, જેમાં 2 લોકોના મોત થયા છે અને 41 લોકો ઘાયલ થયાની જાણકારી મળી રહી છે. મૃતકમાં એક 8 વર્ષના બાળકનો પણ સમાવેશ થાય છે. પોલીસે જાણકારી આપતા જણાવ્યું કે આ અકસ્માત રાજધાની કાઠમંડુથી 20 કિમી દક્ષિણમાં દક્ષિણકાલી નગરપાલિકાના ફારપિંગ વિસ્તારમાં થયો છે. પોલીસના જણાવ્યા અનુસાર, આ અકસ્માત ત્યારે થયો જ્યારે એક સ્કૂલ બસ પહાડી રસ્તા પરથી 150 મીટર નીચે પડી ગઈ. આ સમય દરમિયાન સ્થળ પર લોકો બૂમાબૂમ અને ચીસો પાડી રહ્યા હતા.

ઘટનાની માહિતી મળતા જ પોલીસ ઘટનાસ્થળે પહોંચી ગઈ હતી. પોલીસ અધિકારીઓએ જણાવ્યું હતું કે બસ રસ્તાથી 150 મીટર નીચે પડી જતાં 35 વર્ષીય ડ્રાઈવર અને 8 વર્ષના છોકરાનું મોત થયું છે, જ્યારે અન્ય 41 લોકો ઘાયલ થયા છે. બસમાં 3થી 12 વર્ષની વયના 41 વિદ્યાર્થીઓ અને એક શિક્ષક હોવાનું જાણવા મળી રહ્યું છે. આ અકસ્માતમાં કેટલાક લોકોને ગંભીર ઈજાઓ પહોંચી છે. મૃત્યુ પામેલા બે લોકોના મૃતદેહને પોસ્ટમોર્ટમ માટે મોકલી દેવામાં આવ્યા છે. મૃતકોના પરિવારજનોને જાણ કરવામાં આવી છે.