ISRO અને NASAના સંયુક્ત મિશન NISARને લઈને એક નવી અપડેટ સામે આવી છે. અમેરિકન સ્પેસ એજન્સી નાસાએ માહિતી આપી છે કે તે વર્ષ 2025ની શરૂઆતમાં NISAR સેટેલાઈટ લોન્ચ કરવા જઈ રહ્યું છે. આ વિશ્વનો સૌથી શક્તિશાળી ઉપગ્રહ હશે, જે વિશ્વભરમાં આવતી કુદરતી આફતો પર નજર રાખશે.

અવકાશમાં તૈનાત કર્યા બાદ આ ઉપગ્રહ ભૂકંપ, વરસાદ, ભૂસ્ખલન, ચક્રવાતી તોફાન, વીજળી પડવા, જ્વાળામુખી ફાટવા અને ટેકટોનિક પ્લેટોની હિલચાલ પર નજર રાખશે અને કુદરતી ઘટનાઓ પહેલા એલર્ટ પણ મોકલી દેશે, જેથી આવી તમામ આફતો પહેલા વધુ નુકસાન થતાં અટકાવી શકાય છે. ISRO અને NASAએ સંયુક્ત રીતે આ સેટેલાઈટ બનાવ્યો છે. નાસાના જણાવ્યા મુજબ, આ સેટેલાઈટથી મળેલા ડેટાથી ભૂકંપ, જ્વાળામુખી ફાટવા, ભૂસ્ખલન જેવી કુદરતી આપત્તિની ઘટનાઓને સમજવામાં મોટી મદદ મળશે.

કેવી રીતે કામ કરશે NISAR સેટેલાઈટ ?
નાસાની વેબસાઈટ પર આ મિશન સંબંધિત તમામ વિગતવાર માહિતી આપવામાં આવી છે. જે મુજબ NISAR સેટેલાઈટ પૃથ્વીના સમગ્ર હિસ્સા પર પણ બરફથી ઢંકાયેલી જમીન પર નજર રાખશે. તે દર 12 દિવસમાં બે વાર માપ લેશે અને પ્રાપ્ત ડેટાથી સંશોધકોને સમય સાથે પૃથ્વીની સપાટી કેવી રીતે બદલાઈ રહી છે તેની માહિતી મળશે. દક્ષિણ કેરોલિનામાં નાસાની જેટ પ્રોપલ્શન લેબોરેટરીમાં NISAR એપ્લીકેશનના લીડ કેથલીન જોન્સનું કહેવું છે કે 'આના જેવી નિયમિત દેખરેખથી આપણને એ જોવા મળશે કે પૃથ્વીની સપાટી સમગ્ર ગ્રહ પર કેવી રીતે ફરે છે.

ભારતમાંથી લોન્ચ થશે આ સેટેલાઈટ
નાસાએ જણાવ્યું છે કે આ સેટેલાઈટ 2025ની શરૂઆતમાં ભારતમાંથી લોન્ચ કરવામાં આવશે. તેને શ્રીહરિકોટા સ્થિત સતીશ ધવન સ્પેસ સેન્ટરમાંથી GSLV-MK2 રોકેટ સાથે લોન્ચ કરવામાં આવશે. તેનું એસ-બેન્ડ અમદાવાદમાં ઈસરોના સ્પેસ એપ્લિકેશન સેન્ટરમાં વિકસાવવામાં આવ્યું છે. તેની એલ-બેન્ડ અને સ્પેસક્રાફ્ટ બસ નાસા દ્વારા તૈયાર કરવામાં આવી છે. આ સિવાય NASAએ NISAR સેટેલાઈટ માટે ડેટા રેકોર્ડર, GPS અને પેલોડ ડેટા સબ-સિસ્ટમ જેવા મહત્વના સાધનો બનાવ્યા છે.