ખૈબર પખ્તૂનખ્વા : પાકિસ્તાનમાં અત્યારે ચેમ્પિયન ટ્રોફી રમાઈ રહી છે ત્યાં ખેલાડીઓની સુરક્ષાને લઈને ફરી ચિંતા ઊભી થઈ છે. પાકિસ્તાનના ખૈબર પખ્તૂનખ્વા પ્રાંતના નૌશેરા જિલ્લામાં સુસાઇડ ઍટેક થયો છે જેમાં મૌલાના હમીદુલ હક હક્કાની સહિત પાંચ લોકોના મોત થયા છે, જ્યારે 20 ઈજાગ્રસ્ત છે. મદરસામાં શુક્રવારની નમાઝ દરમિયાન આ બ્લાસ્ટ થયો હતો. અહેવાલો અનુસાર, વિસ્ફોટ ખૈબર પખ્તુનખ્વા પ્રાંતના જિલ્લા અક્કોરા ખટ્ટકમાં થયો હતો. અધિકારીઓ આ અંગે તપાસ કરી રહ્યા છે અને મૃતકો અને ઘાયલોને હોસ્પિટલમાં લઈ જવામાં આવી રહ્યા છે. જોકે, જામિયા હક્કાનીયાની અંદર થયેલા હુમલાની જવાબદારી હજુ સુધી કોઈ જૂથે લીધી નથી. આ મદરેસા અફઘાન તાલિબાન સાથેના સંબંધો માટે જાણીતું છે. તેના વિશાળ કેમ્પસમાં લગભગ 4,000 વિદ્યાર્થીઓ રહે છે, જેમને મફત ખોરાક, કપડાં અને શિક્ષણ આપવામાં આવે છે. આ વિસ્ફોટ મુસ્લિમોના પવિત્ર રમઝાન મહિના પહેલા થયો છે, જે શનિવાર અથવા રવિવારે ચાંદ દેખાય ત્યારે શરૂ થવાની ધારણા છે. નોંધનીય છે કે, પાકિસ્તાની મદરેસાઓ આતંકવાદ માટે ઉછેર કેન્દ્ર તરીકે સેવા આપી રહ્યા છે, હજારો શરણાર્થીઓને શિક્ષણ પૂરું પાડે છે જેમની પાસે કટ્ટરપંથી મૌલવીઓના ભડકાઉ ભાષણો સિવાય શિક્ષણ માટે બીજો કોઈ વિકલ્પ નથી.