પાડોશી દેશ પાકિસ્તાને પચાવી પાડેલા પીઓકેમાં ગમખ્વાર અકસ્માતની ઘટના સામે આવી છે. અહીં પ્રવાસીઓથી ભરેલી એક બસ સિંધુ નદીમાં ખાબકી હતી. આ ઘટનામાં મોટી સંખ્યામાં લોકો મોતને ભેટ્યા છે.

પાકિસ્તાન દેશે પચાવેલા પીઓકેના ગિલગિત-બાલ્ટિસ્તાન ક્ષેત્રમાં કરૂણ અકસ્માત થયો હતો. જેમાં લગ્નમાં જતા જાનૈયાઓ લઈ જતી બસ સિંધુ નદીના અફાટ જળમાં જઈ ધરબાઈ ગઈ હતી. તમામ પ્રવાસીઓ આ દુર્ઘટનાનો ભોગ બન્યા હતા. ઘટનાની જાણ થતા સ્થાનિક લોકો અને પોલીસ તંત્ર ઘટનાસ્થળે જઈ બચાવ અને રાહત કામગીરી પૂરજોશમાં શરૂ કરી હતી. ઈજાગ્રસ્તોને નજીકની હોસ્પિટલમાં ખસેડયા હતા.

મળતી માહિતી અનુસાર, જે બસ અકસ્માતનો ભોગ બની તે પાકિસ્તાનના પંજાબના ચકવાલ જિલ્લા તરફ જઈ રહી હતી, જો કે, રસ્તામાં જ આ બસ એક પુલ પરથી સીધી નીચે સિંધુ નદીમાં પડી ગઈ હતી. બસ નદીમાં ખાબકવાથી ઓછામાં ઓછા 26 લોકોનાં મોત થયા હતા અને કેટલાક લોકો ઈજાગ્રસ્ત પણ થયા છે.