અમેરિકાના રાષ્ટ્રપ્રમુખ ડોનાલ્ડ ટ્રમ્પ ફેડરલ કોર્ટનો નિર્ણય પણ માની રહ્યા નથી. ફેડરલ કોર્ટના જજે ડિપોર્ટેશન પર રોક લગાવવાનો આદેશ આપ્યો હોવા છતાં ટ્રમ્પ સરકારે સેંકડો ઈમિગ્રન્ટ્સને અલ સાલ્વાડોરમાં ડિપોર્ટ કર્યા છે. આ ડિપોર્ટેશન પ્રક્રિયા કોર્ટના નિર્ણયની વિરૂદ્ધમાં હાથ ધરાઈ હતી.

ડોનાલ્ડ ટ્રમ્પની કોર્ટનો આદેશ ન માનવા બદલ ચારેકોર ટીકાઓ થઈ રહી છે, એવામાં ટ્રમ્પ સરકારે પોતાનો લૂલો બચાવ કરતાં કહ્યું કે, આ ડિપોર્ટેશન પ્રક્રિયા એવા સમયે હાથ ધરાઈ હતી, જ્યારે કોર્ટ ચુકાદો આપી રહી હતી. કોર્ટનો ચુકાદો જાહેર થાય તે પહેલાં જ આ ઈમિગ્રન્ટ્સને ડિપોર્ટ કરતું વિમાન ટેક-ઓફ થઈ ચૂક્યુ હતું.

રિપોર્ટ અનુસાર, અમેરિકાના ડિસ્ટ્રિક્ટ જજ જેમ્સ ઈ બોસબર્ગે શનિવારે ઈમિગ્રેશન પર અસ્થાયી રૂપે પ્રતિબંધ લાદવાનો આદેશ આપ્યો હતો. જો કે, ટ્રમ્પ સરકારે બે વિમાનમાં ઈમિગ્રન્ટ્સને ડિપોર્ટ કર્યા હતા. આ બાબતે ટ્રમ્પના વકીલોએ જણાવ્યું હતું કે, ઈમિગ્રેશનને લઈને બે વિમાન પહેલાં જ ટેક-ઓફ થી ગયા હતા. જેમાં એક અલ સાલ્વાડોર અને એક હોન્ડુરાસમાં ડિપોર્ટ થયુ હતું.