અમેરિકામાં આજે ડોનાલ્ડ ટ્રમ્પ રાષ્ટ્રપતિ પદે શપથ ગ્રહણ કરશે. રાષ્ટ્રપતિ બન્યા બાદ ટ્રમ્પની ગેરકાયદે વસતાં ઈમિગ્રન્ટ્સને હાંકી કાઢવાની કવાયતનો પોપ ફ્રાન્સિસે વિરોધ કર્યો છે. તેમણે ટ્રમ્પની આકરી ટીકા કરતાં આ પ્રકારનું પગલું અમાનવીય હોવાનું જણાવ્યું છે. ઉલ્લેખનીય છે, ટ્રમ્પે ચૂંટણી દરમિયાન આપેલા વચનને અનુરૂપ અમેરિકામાં વસતા ગેરકાયદે ઈમિગ્રન્ટ્સને હાંકી કાઢવાની કવાયત  સત્તા પર આવ્યા બાદ હાથ ધરી શકે છે. જેનો ઘણા લોકો વિરોધ કરી રહ્યા છે.પોપ ફ્રાન્સિસ ડોનાલ્ડ ટ્રમ્પ પર ભડકી ઉઠ્યા છે. તેમણે ટ્રમ્પની ઈમિગ્રેશન પોલિસીઓની નિંદા કરતાં કહ્યું છે કે, તેમની ઈમિગ્રન્ટ્સને હાંકી કાઢવાની યોજના અપમાનજનક છે. જે ઈમિગ્રન્ટ્સ પાસે કંઈ જ નથી, તેઓ ક્યાં જશે અને ક્યાં રહેશે. ટ્રમ્પે તેની ભારે કિંમત ચૂકવવી પડી શકે છે. ટ્રમ્પની યોજના યોગ્ય નથી, આ પગલું સમસ્યાનું સમાધાન નથી.  ટ્રમ્પ ઈમિગ્રેશન પોલિસી મુદ્દે આકરૂ વલણ લઈ શકે છે. તેમના એક અધિકારીએ જણાવ્યું હતું કે, ટ્રમ્પ દેશભરમાં ગેરકાયદે વસતાં ઈમિગ્રન્ટ્સ વિરૂદ્ધ અભિયાન ચલાવવાના છે. જેમાં ન્યૂયોર્ક, મિયામીમાંથી ઘણા લોકોની ધરપકડ થઈ શકે છે. ટ્રમ્પે ચૂંટણી દરમિયાન પણ અમેરિકન્સને વચન આપ્યું હતું કે, હું દેશમાં વસતાં ગેરકાયદે ઈમિગ્રન્ટ્સ મુદ્દાનો ઉકેલ લાવીશ. તેમજ ઈમિગ્રેશન પોલિસીમાં ફેરફારો સાથે એક નવા અમેરિકાની રચના કરીશ. અમેરિકામાં ગેરકાયદે પ્રવેશ કરનારા ઈમિગ્રન્ટ્સની આગામી સપ્તાહથી અટકાયત કરવામાં આવશે.