દેશની અગ્રણી ફાસ્ટ મૂવિંગ કન્ઝ્યુમર ગુડ્સ અને બેકરી કંપની બ્રિટાનિયા ઇન્ડસ્ટ્રીઝ લિમિટેડને પોતાના લોકપ્રિય ઉત્પાદનના પ્રચારમાં ભ્રામક દાવો કરવા બદલ 1 લાખ રૂપિયાનો દંડ ફટકારવામાં આવ્યો છે. કંપનીની 100 ટકા ઘઉંની બ્રેડની જાહેરાત ગ્રાહકોને ગેરમાર્ગે દોરતી હોવાનું સામે આવતાં સેન્ટ્રલ કન્ઝ્યુમર પ્રોટેક્શન ઓથોરિટીએ આ કાર્યવાહી કરી છે.

તપાસ દરમિયાન સત્તામંડળે જાતે જ આ ફરિયાદ હાથ પર લીધી હતી. જેમાં જાણવા મળ્યું હતું કે બ્રિટાનિયા જાહેરાતોમાં 100 ટકા ઘઉંની બ્રેડનો પ્રચાર કરે છે, પરંતુ પેકેટની પાછળ દર્શાવેલી વિગતમાં ઘઉંના લોટનું પ્રમાણ માત્ર 62 ટકા જ હતું. જ્યારે બાકીના 38 ટકામાં ચોખાનું ભૂસું અને અન્ય ઘટકો સામેલ હોવાનું જણાયું હતું.

વધુમાં, સત્તામંડળે જણાવ્યું હતું કે 100 ટકા ઘઉંના લોટનો દાવો ખોટો હતો, કારણ કે તેનાથી ગ્રાહકોમાં એવી છાપ ઊભી થઈ હતી કે આ ઉત્પાદન સંપૂર્ણપણે ઘઉંમાંથી જ બનેલું છે.

બીજી તરફ, મુખ્ય કમિશનર નિધિ ખરેના નેતૃત્વ હેઠળના સત્તામંડળે કંપનીને આ ભ્રામક જાહેરાત તમામ માધ્યમો પરથી તાત્કાલિક હટાવી લેવા અને 15 દિવસમાં પાલન અહેવાલ રજૂ કરવા નિર્દેશ આપ્યો છે. પેકેજ્ડ ફૂડ ઉદ્યોગમાં જાહેરાતોની પ્રામાણિકતા અને ગ્રાહક અધિકારોની દૃષ્ટિએ આ નિર્ણય ખૂબ જ મહત્ત્વપૂર્ણ માનવામાં આવે છે.