Gold-Silver Price: સોના-ચાંદીની કિંમતોમાં પણ હવે શેર બજાર જેવો ટ્રેન્ડ જોવા મળી રહ્યો છે. અચાનક જ ભારે તેજી જોવા મળે અને અચાનક જ કિંમતો ક્રેશ થઈ જાય. સોના-ચાંદીની કિંમતમાં ગયા સપ્તાહે જોરદાર ઘટાડો જોવા મળ્યો છે. ચાંદીની કિંમત 4 લાખ રૂપિયાને પાર ગયા બાદ અચાનક જ ક્રેશ થઈ ગઈ હતી. સોનાના ભાવમાં પણ જોરદાર ઘટાડો થઈ રહ્યો હતો. જોકે આજે બંને કિંમતી ધાતુના ભાવમાં તેજી જોવા મળી છે. 

મંગળવારે MCX પર વાયદા બજારમાં માર્કેટ ખૂલતાં જ સોના-ચાંદીની કિંમતમાં તોફાની તેજી જોવા મળી. સોમવારે ચાંદીની કિંમત 2.25 લાખ રૂપિયા થઈ હતી. આજે માર્કેટ ખૂલતાં જ ચાંદીની કિંમતમાં 21 હજાર રૂપિયાનો વધારો જોવા મળ્યો. સોનાના ભાવમાં પણ એકઝાટકે 5 હજાર રૂપિયાનો વધારો નોંધાયો છે. 

આજે 1 કિલો ચાંદીની કિંમત 2,57,480 રૂપિયા પહોંચી છે. અગાઉ 29 જાન્યુઆરીએ ચાંદીની કિંમત પહેલીવાર 4 લાખ રૂપિયાને પાર થઈ હતી. સોમવારે 10 ગ્રામ સોનાનો ભાવ MCX પર 1,43,991 રૂપિયા પર બંધ થયો હતો. આજે તેમાં 5,494 રૂપિયાનો ઉછાળો નોંધાતા માર્કેટની શરૂઆતમાં સોનાની કિંમત 1,49,485 રૂપિયા પહોંચી હતી. જોકે હાલમાં જ 29 જાન્યુઆરીએ સોનાનો ભાવ ઓલટાઈમ હાઈ પર પહોંચ્યો હતો. જ્યારે 10 ગ્રામ સોનાની કિંમત 1,93,096 રૂપિયા થઈ ગઈ હતી.