ડોનાલ્ડ ટ્રમ્પ પ્રશાસન અમેરિકામાં શરણ માટે અરજી કરનારા અથવા શરણ મેળવવાનો પ્રયાસ કરી રહેલા આશરે 2 લાખ વિદેશી નાગરિકોના બિઝનેસ (B1) અને ટૂરિઝમ (B2) વીઝા રદ્દ કરવાની તૈયારી કરી રહ્યું છે. યોજનામાં કોઈ ફેરફાર ન થાય અથવા તેને કોઈ કાનૂની પડકાર ન મળે તો વિદેશ વિભાગ આગામી સપ્તાહોમાં તેની સત્તાવાર જાહેરાત કરી શકે છે. અમેરિકી ઇતિહાસમાં એકસાથે આટલી મોટી સંખ્યામાં વીઝા રદ્દ કરવાનો આ પ્રથમ મોટો કિસ્સો બની શકે છે.

અહેવાલો અને વિદેશ વિભાગના દસ્તાવેજો અનુસાર, આ કાર્યવાહી હેઠળ 2016થી 2026 દરમિયાન ઇશ્યૂ કરાયેલા B1 અને B2 વીઝાનો સમાવેશ કરવામાં આવ્યો છે. વિદેશ વિભાગના પ્રવક્તા ટોમી પિગોટે કહ્યું કે હોમલેન્ડ સિક્યોરિટી વિભાગ સાથે મળીને એવા વિદેશી નાગરિકોની ઓળખ કરવામાં આવી રહી છે, જેઓ ટૂંકા ગાળાના મુલાકાતી તરીકે અમેરિકા આવ્યા હતા અને ત્યારબાદ દેશમાં કાયમી રહેવા માટે શરણની અરજી કરી હતી.

જોકે, વીઝા રદ્દ થવાનો અર્થ એ નથી કે સંબંધિત લોકોને તાત્કાલિક અમેરિકામાંથી હાંકી કાઢવામાં આવશે. જે લોકોના શરણના કેસ કોર્ટમાં પેન્ડિંગ છે, તેઓ કાયદાકીય રીતે પોતાના દાવા પર આગળ વધી શકશે. પરંતુ તેઓ બિઝનેસ અથવા ટૂરિઝમ મુલાકાતી તરીકેનો વીઝા દરજ્જો ગુમાવી દેશે. ટ્રમ્પ પ્રશાસનના બીજા કાર્યકાળની શરૂઆતથી જ અમેરિકાના વીઝા અને ઇમિગ્રેશન નિયમોને વધુ કડક બનાવવાની દિશામાં આ પગલું લેવામાં આવી રહ્યું છે.