અફઘાનિસ્તાન અને પાકિસ્તાન વચ્ચેની સરહદ પર તણાવ ફરી એકવાર વધી ગયો છે. પાકિસ્તાની સેનાના લડાકુ વિમાનોએ 9 જૂનની રાત્રે અફઘાનિસ્તાનની હવાઈ સરહદનું ઉલ્લંઘન કરીને સામાન્ય નાગરિકોના ઘરોને નિશાન બનાવીને ભારે બોમ્બમારો કર્યો હતો. આ હવાઈ હુમલામાં 11 માસૂમ બાળકો સહિત કુલ 13 લોકોના મોત થયા હતા. અફઘાન પ્રવક્તા ઝબીઉલ્લાહ મુજાહિદે જાહેર કરેલા નિવેદન અનુસાર, પાકિસ્તાની સેનાએ અફઘાનિસ્તાનના સાર્વભૌમત્વનું ખુલ્લેઆમ ઉલ્લંઘન કર્યું હતું.

પ્રવક્તાએ વધુમાં જણાવ્યું હતું કે પાકિસ્તાની વિમાનોએ અફઘાનિસ્તાનના ત્રણ મુખ્ય પ્રાંતો કુનાર, ખોસ્ત અને પક્તિકાના રહેણાંક વિસ્તારોને નિશાન બનાવ્યા હતા. સામાન્ય નાગરિકોના ઘરો પર કરાયેલા આ આડેધડ બોમ્બમારાના કારણે ઘણા ઘરો સંપૂર્ણપણે નાશ પામ્યા હતા. આ હુમલામાં 11 બાળકો, એક મહિલા અને એક વૃદ્ધ વ્યક્તિનું મોત થયું હતું, જેમને અફઘાન વહીવટીતંત્રે શહીદ જાહેર કર્યા હતા. આ સિવાય હુમલામાં મહિલાઓ અને બાળકો સહિત અન્ય 14 લોકો ગંભીર રીતે ઘાયલ થયા હતા.

ઘાયલોને નજીકની હોસ્પિટલોમાં દાખલ કરવામાં આવ્યા હતા, જ્યાં ઘણા લોકોની હાલત નાજુક બનેલી હતી. સોશિયલ મીડિયા પર આ હુમલા પછીની કેટલીક પીડાદાયક તસવીરો પણ સામે આવી હતી, જેમાં ભોગ બનેલા બાળકોની સ્થિતિ જોઈ શકાતી હતી. આ ઘટના બાદ અફઘાન સરકારનો ભારે રોષ જોવા મળ્યો હતો. પ્રવક્તા ઝબીઉલ્લાહ મુજાહિદે આ કાર્યવાહીની સખત નિંદા કરતા તેને આંતરરાષ્ટ્રીય નિયમોનું ઉલ્લંઘન અને સામાન્ય નાગરિકો વિરુદ્ધનો એક ક્રૂર ગુનો ગણાવ્યો હતો.