ચૂંટણી પંચની સ્પેશિયલ ઇન્ટેન્સિવ રિવિઝન (SIR) પ્રક્રિયા અને મુખ્ય ચૂંટણી કમિશનર જ્ઞાનેશ કુમાર અંગેના આરોપો વચ્ચે સુપ્રીમ કોર્ટમાં અરજી દાખલ કરવામાં આવી છે. અરજીમાં દાવો કરાયો છે કે ચૂંટણી પંચમાં સત્તાનું કેન્દ્રીકરણ થયું અને બંને ચૂંટણી આયુક્ત સુખબીર સિંહ સંધૂ તથા વિવેક જોશીની સંમતિ વિના કેટલાક મહત્વના નિર્ણયો લેવાયા. અરજીમાં સમગ્ર મામલે ન્યાયિક તપાસ અથવા એસઆઈટી રચવાની માગ કરવામાં આવી છે.

અરજીમાં SIR પ્રક્રિયામાં ફેરફાર, ફોર્મ-6માં બદલાવ, ECINet મારફતે ડેટા નિયંત્રણ અને ઇલેક્ટોરલ રજિસ્ટ્રેશન અધિકારીઓ પરના પ્રતિબંધો સહિતના નિર્ણયો રદ કરવાની માગ કરાઈ છે. પશ્ચિમ બંગાળમાં બંને ચૂંટણી આયુક્તોને જાણ કર્યા વિના 16.10 લાખ અપીલો દાખલ કરવાના મુદ્દાનો પણ અરજીમાં ઉલ્લેખ છે. અરજીમાં એક અહેવાલને આધાર બનાવાયો છે, જેમાં છેલ્લા 10 મહિનામાં બંને આયુક્તોએ ઓછામાં ઓછા 14 વખત કેટલાક નિર્ણયો સામે વાંધો ઉઠાવ્યાનો દાવો કરાયો છે.

અરજીમાં બંને આયુક્તોની સંમતિ વિના લેવાયેલા નિર્ણયો રદ કરી અગાઉનું ફોર્મ-6 ફરી લાગુ કરવાની માગ છે. ઉપરાંત ECINet હેઠળ એકત્રિત ડેટાની ફોરેન્સિક તપાસ અને સમગ્ર મામલે ન્યાયિક તપાસ અથવા એસઆઈટી તપાસની માગ કરવામાં આવી છે. બીજી તરફ, ચૂંટણી પંચે કહ્યું છે કે આંતરિક મતભેદ કામકાજનો ભાગ છે અને અંતિમ નિર્ણયો સહમતિથી લેવાય છે.