ગ્લાસગોઃ કોમનવેલ્થ ગેમ્સ 2026ના નવમા દિવસે ભારતે ભાલા ફેંક સ્પર્ધામાં બે મેડલ જીત્યા હતા. સ્ટાર ખેલાડી નીરજ ચોપરાએ 85.83 મીટરના શ્રેષ્ઠ થ્રો સાથે સિલ્વર મેડલ જીત્યો હતો, જ્યારે યશ વીર સિંહે અંતિમ પ્રયાસમાં 85.41 મીટરનો થ્રો કરીને બ્રોન્ઝ મેડલ પોતાના નામે કર્યો હતો. શ્રીલંકાના રૂમેશ થરંગાએ 89.75 મીટરના થ્રો સાથે ગોલ્ડ મેડલ જીત્યો હતો.

જેવેલિન થ્રોની ફાઇનલમાં કુલ 12 ખેલાડીઓએ ભાગ લીધો હતો, જેમાં ભારતના ત્રણ ખેલાડીઓ સામેલ થયા હતા. નીરજ ચોપરાએ પ્રથમ પ્રયાસમાં 80.97 મીટર, બીજા પ્રયાસમાં સિઝનનો પોતાનો શ્રેષ્ઠ 85.83 મીટર, ત્રીજા પ્રયાસમાં 81.29 મીટર અને ચોથા પ્રયાસમાં 80.73 મીટરનો થ્રો કર્યો હતો. જોકે, રૂમેશ થરંગાના 89.75 મીટરના થ્રોને તે પાછળ છોડી શક્યો નહોતો અને તેને સિલ્વર મેડલથી સંતોષ માનવો પડ્યો હતો.

ભારતના અન્ય ખેલાડી યશ વીર સિંહે અંતિમ રાઉન્ડમાં 85.41 મીટરનો પોતાનો શ્રેષ્ઠ થ્રો કરીને ત્રીજું સ્થાન મેળવ્યું હતું અને બ્રોન્ઝ મેડલ જીત્યો હતો. જ્યારે રોહિત યાદવ 81.56 મીટરના થ્રો સાથે સાતમા સ્થાને રહ્યો હતો. આમ ભાલા ફેંક સ્પર્ધામાં ભારતે કુલ બે મેડલ જીત્યા હતા.

ભાલા ફેંકમાં સિલ્વર મેડલ જીતવા બદલ નીરજ ચોપરા અને બ્રોન્ઝ મેડલ જીતવા બદલ યશ વીર સિંહને વડાપ્રધાન નરેન્દ્ર મોદીએ અભિનંદન પાઠવ્યા હતા. એક્સ પર પોસ્ટ કરીને તેમણે યશ વીર સિંહના પ્રદર્શનની પ્રશંસા કરતાં લખ્યું હતું કે તેમનો શાનદાર થ્રો તેમના સમર્પણ અને જુસ્સાનું પ્રતિબિંબ હતો તેમજ તેમની સિદ્ધિ અનેક યુવા ખેલાડીઓ માટે પ્રેરણારૂપ બનશે. તેમણે બંને ખેલાડીઓને ભવિષ્ય માટે શુભકામનાઓ પણ પાઠવી હતી.