બાળકોની ઓનલાઇન સુરક્ષા સુનિશ્ચિત કરવા અને હાનિકારક કન્ટેન્ટને રોકવા માટે કેન્દ્ર સરકારના કડક વલણ બાદ ફેસબુક અને ઇન્સ્ટાગ્રામની પિતૃ સંસ્થા મેટાએ એક મોટો નિર્ણય લીધો છે. કંપનીએ સરકારને ખાતરી આપી છે કે બાળ યૌન શોષણ અને બાળકોની સુરક્ષાને લગતા તમામ સંવેદનશીલ કેસોની સીધી જાણ હવે ભારતીય કાયદા અમલીકરણ એજન્સીઓને કરવામાં આવશે. ઇલેક્ટ્રોનિક્સ અને ઇન્ફોર્મેશન ટેકનોલોજી મંત્રાલયના એક વરિષ્ઠ અધિકારીના જણાવ્યા પ્રમાણે, મેટા દ્વારા આ અંગે મંત્રાલયને સત્તાવાર પત્ર પાઠવીને જાણ કરી દેવામાં આવી છે.

તાજેતરમાં ઇન્સ્ટાગ્રામ પર પેઇડ જાહેરાતોના માધ્યમથી બાળ યૌન શોષણને લગતી સામગ્રી અને એપ્સને પ્રમોટ કરવાના ગંભીર આક્ષેપો લાગ્યા હતા. આ મામલે નેશનલ કમિશન ફોર પ્રોટેક્શન ઓફ ચાઇલ્ડ રાઇટ્સ દ્વારા મેટા ઇન્ડિયાના વરિષ્ઠ અધિકારીઓને સમન્સ મોકલીને ખુલાસો માંગવામાં આવ્યો હતો. ટેક ટ્રાન્સપરન્સી પ્રોજેક્ટના એક સંશોધન રિપોર્ટમાં એવો પણ ચોંકાવનારો ખુલાસો થયો હતો કે મેટાના પ્લેટફોર્મ પર 300 થી વધુ એવી પેઇડ જાહેરાતો ચાલી રહી હતી જેમાં એઆઈ દ્વારા વિકૃત કરાયેલી બાળકોની અશ્લીલ છબીઓ દર્શાવાઈ હતી. જોકે, આ રિપોર્ટ બાદ કંપનીએ મોટા પાયે આવી જાહેરાતો હટાવી લીધી હતી.

આ સમગ્ર ઘટનાક્રમ વચ્ચે સોમવારે મેટા દ્વારા કેરળના મુખ્યમંત્રી વી. ડી. સતીશનનો એક વાયરલ એઆઈ ડીપફેક વીડિયો ભારતમાં પ્રતિબંધિત કરી દેવાયો છે. આ વીડિયોમાં તેઓ KSEB અધિકારીઓ સાથે ડાન્સ કરતા જોવા મળી રહ્યા હતા. ભારતમાં બ્લોક કરવામાં આવ્યો તે પહેલાં આ વીડિયોને 1.78 કરોડથી વધુ વ્યુઝ મળી ચૂક્યા હતા. ભારત સિવાય અન્ય દેશોમાં આ વીડિયો હજુ પણ જોઈ શકાય છે.

આ વીડિયો બનાવનાર ક્રિએટર્સે એવું જણાવ્યું છે કે મેટાએ સરકારી નોટિસના આધારે આ પગલું ભર્યું છે. બીજી તરફ, ખુદ મુખ્યમંત્રી સતીશને આ વીડિયોની રમૂજ માણી હતી પરંતુ સાથે જ એઆઈ કન્ટેન્ટના કાયદાકીય પાસાઓ પર પોતાની ચિંતા વ્યક્ત કરી હતી. ક્રિએટર્સ એવું માની રહ્યા છે કે મુખ્યમંત્રી કાર્યાલય દ્વારા આ વીડિયો હટાવવાની કોઈ માંગણી કરવામાં આવી નહોતી. અગાઉ મેટા દ્વારા આવા વીડિયો દૂર થવા પાછળ ટેકનિકલ ખામી જવાબદાર હોવાનું કારણ રજૂ કરવામાં આવ્યું હતું.