સાઉદી અરેબિયા પર હૂતી વિદ્રોહીઓએ ફરી હુમલો કર્યો છે. હૂતીઓએ દાવો કર્યો છે કે દક્ષિણ-પશ્ચિમ સાઉદી અરેબિયાના ખમીસ મુશૈતમાં ડઝનબંધ મિસાઇલ અને ડ્રોન છોડવામાં આવ્યા હતા અને એક સૈન્ય એરબેઝને નિશાન બનાવાયું હતું. હુમલામાં 13 નાગરિકો ઘાયલ થયાના અહેવાલ છે. જોકે, સાઉદી સિવિલ ડિફેન્સે બાદમાં ખતરો ટળી ગયો હોવાનું જણાવ્યું હતું.

હુમલા બાદ સાઉદી સત્તાવાળાઓએ ખમીસ મુશૈત, આભા અને તાઈફ સહિત દક્ષિણના અનેક શહેરોમાં ઇમરજન્સી એલર્ટ જાહેર કર્યું છે. તેમાં જેદ્દાહ, આભા અને જાઝાનનો પણ સમાવેશ થાય છે. આ કાર્યવાહી હૂતી વિદ્રોહીઓ તરફથી વધુ હુમલાની આશંકા વચ્ચે કરવામાં આવી છે.

હૂતીઓએ પોતાના તાજેતરના હુમલાને સાઉદી અરેબિયાની યમનમાં કરાયેલી તાજેતરની હવાઈ કાર્યવાહીનો વળતો જવાબ ગણાવ્યો છે. સાઉદીના હુમલામાં વિમાનના હેંગર, રડાર સિસ્ટમ, રનવે અને દારૂગોળાના ડેપોને નિશાન બનાવવામાં આવ્યા હતા. બીજી તરફ, લાલ સમુદ્રના પ્રવેશદ્વાર નજીક આવેલા પેરિમ ટાપુ પર હૂતીઓની આગેકૂચથી સાઉદીની તેલ નિકાસ પર દબાણ વધ્યું છે.

આ અગાઉના એક હવાઈ હુમલાને કારણે સાઉદી અરેબિયાની ઈસ્ટ-વેસ્ટ પાઈપલાઈન ઠપ થઈ ગઈ હતી. દરમિયાન સાઉદી અને યમનની વાયુસેનાએ મોચા બંદરની આસપાસ હૂતી ઠેકાણાઓ પર બોમ્બમારો વધુ તેજ કર્યો છે. આ કાર્યવાહી છતાં હૂતીઓએ લગભગ સમગ્ર પશ્ચિમી તટ પર પોતાનો કબજો જાળવી રાખ્યો છે.