રવિવારે વહેલી સવારે મલેશિયાના સબાહ પ્રાંતમાં આવેલા ‘કામ્પોન્ગ બહાગિયા’ નામના ગામમાં એક ભયાનક આગ લાગી હતી. આ આગે જોતજોતામાં આખા વિસ્તાર લપેટમાં આવી ગયો હતો. સમુદ્રતટ પાસે આવેલા આ વિસ્તારમાં મોટાભાગના ઘરો લાકડાના થાંભલા પર બનેલાં હતાં. સાંકડી ગલીઓ અને લાકડાના માળખાને કારણે આગ ઝડપથી આખા વિસ્તારમાં ફેલાઈ ગઈ હતી.

સ્થાનિક સમય મુજબ રાત્રે 1.30 વાગ્યે લાગેલી આ આગમાં અંદાજે 1000 જેટલાં ઘરો બળીને ખાખ થઈ ગયાં હતાં, જેના કારણે 9000 લોકો બેઘર બન્યા છે. ફાયર ફાઈટરોએ આગ પર કાબૂ મેળવવા ખૂબ મથામણ કરી હતી, પરંતુ પવનની ગતિ વધુ હોવાથી પાણીના મારા છતાં આગ સતત ફેલાતી રહી હતી. અંદાજે 3 કલાકની ભારે જહેમત બાદ વહેલી સવારે આગ કાબૂમાં આવી હતી, ત્યાં સુધીમાં આખો વિસ્તાર રાખમાં તબદીલ થઈ ચૂક્યો હતો.

ગનીમત એ રહી હતી કે આ ભયાનક આગમાં કોઈ જાનહાનિ નોંધાઈ નથી. જોકે, પોતાનો સામાન બચાવવાના પ્રયાસમાં અને બીજાની મદદ કરતી વખતે સેંકડો લોકો સામાન્ય રીતે દાઝ્યા હતા. સ્થાનિક વહીવટી તંત્ર દ્વારા હજી સુધી આગ લાગવાનું ચોક્કસ કારણ જાણી શકાયું નથી.