ઈરાન અને ઇઝરાયેલના યુદ્ધમાં અમેરિકાની એન્ટ્રી થઈ ચૂકી છે. અમેરિકાએ ઈરાનના ત્રણ પરમાણુ મથકો પર રવિવારે સવારે બોમ્બમારો કર્યો હતો. ત્યાર બાદ ઈરાને પણ પલટવાર કરવાની ધમકી આપી છે. આ ઘટનાક્રમ પછી પશ્ચિમ એશિયામાં તણાવ વધવાની આશંકા છે. તેની સીધી અસર તેલની કિંમતો પર પડશે. જોકે, ભારતને પહેલાં જ પરિસ્થિતિ સમજીને નવી રણનીતિ હેઠળ રશિયા અને અમેરિકામાંથી કાચા તેલની આયાત વધારી દીધી છે. 

ભારતે જૂન મહિનામાં રશિયા પાસેથી એટલું તેલ ખરીદ્યું છે, જે પશ્ચિમ એશિયા અને ખાડી દેશોમાંથી ખરીદાયેલા કાચા તેલ કરતાં પણ વધારે છે. એક આંકડા અનુસાર, ભારતે જૂન મહિનામાં રશિયા પાસેથી પ્રતિદિન 20-22 લાખ બેરલના ધોરણે કાચું તેલ ખરીદ્યું છે, જે છેલ્લાં બે વર્ષમાં સૌથી વધારે છે. મે મહિનામાં ભારતે રશિયા પાસેથી લગભગ 11 લાખ બેરલ પ્રતિ દિવસના ધોરણે કાચું તેલ ખરીદ્યું હતું. 

ભારત પહેલાં રશિયા પાસેથી પોતાની જરૂરિયાતના માત્ર એક ટકા તેલની આયાત કરતું હતું, પરંતુ હવે તેમાં વધારો થયો છે અને હવે ભારત કુલ તેલ આયાતના 40-44 ટકા તેલ રશિયા પાસેથી મગાવે છે. સ્પષ્ટ છે કે, જૂનમાં પશ્ચિમ એશિયામાં વધેલા તણાવને ધ્યાનમાં રાખીને ભારતે પોતાની આયાત રણનીતિમાં ફેરફાર કર્યો છે.