કોલંબો : મધ્ય-પૂર્વમાં ચાલી રહેલા ભયાનક સંઘર્ષની સીધી અસર હવે પડોશી દેશ શ્રીલંકા પર જોવા મળી રહી છે. રવિવારે શ્રીલંકા સરકારે ઈંધણના ભાવમાં ઝીંકેલા 25% સુધીના તોતિંગ વધારાએ જનતાની કમર તોડી નાખી છે. ઈરાન અને અમેરિકા-ઈઝરાયેલ વચ્ચે વધતા તણાવ અને હોર્મુઝની ખાડી બંધ થવાને કારણે વૈશ્વિક તેલ પુરવઠા પર અસર પડી છે, જેના પગલે શ્રીલંકાએ એક જ અઠવાડિયામાં બીજી વાર ભાવ વધારો કરવો પડ્યો છે. નવા વધારા બાદ શ્રીલંકામાં ઓટો ડીઝલની કિંમત 303 રૂપિયાથી વધીને 382 રૂપિયા પ્રતિ લીટર થઈ ગઈ છે, જ્યારે સુપર ડીઝલ 443 રૂપિયા સુધી પહોંચી ગયું છે. પેટ્રોલના ભાવમાં પણ ધરખમ વધારો થયો છે, જેમાં 92 ઓક્ટેન પેટ્રોલ હવે 398 રૂપિયા અને 95 ઓક્ટેન 455 રૂપિયા પ્રતિ લીટરના ભાવે વેચાઈ રહ્યું છે. આ ઉપરાંત કેરોસીનના ભાવમાં પણ 30%થી વધુનો વધારો ઝીંકવામાં આવ્યો છે. ઈંધણ મોંઘું થતા જ ખાનગી બસ ઓપરેટરોએ ભાડામાં 15% વધારાની માંગ કરી છે અને જો માંગ પૂરી નહીં થાય તો દેશવ્યાપી હડતાળની ચીમકી આપી છે. નેશનલ ટ્રાન્સપોર્ટ કમિશનના જણાવ્યા મુજબ બસ ભાડામાં 10%થી વધુનો વધારો નિશ્ચિત માનવામાં આવે છે. આ મોંઘવારીને કારણે આગામી દિવસોમાં દેશમાં ફુગાવો 5થી 8 ટકા સુધી વધી શકે તેવી ભીતિ છે.