હિમાચલ પ્રદેશના પ્રવાસે ગયેલા ભાવનગરના સિંધી પરિવારને નડ્યો ભયાનક અકસ્માત નડ્યો હતો. ચંબા-નૂરપુર નેશનલ હાઈવે પર તુનુહટ્ટી વિસ્તારના કાકીરા ધાર પાસે ધર્મશાલાથી જઈ રહેલી એક કાર અનિયંત્રિત થઈને લગભગ 150 મીટર ઊંડી ખાઈમાં ખાબકી હતી. આ અકસ્માતમાં પરિવારના 6 સભ્યોના મોત થયા હતા, જ્યારે 4 લોકોનો આબાદ બચાવ થયો હતો. આ ઘટના સમયે વિસ્તારમાં ભારે વરસાદ પડી રહ્યો હતો, જેના કારણે રસ્તો લપસણો બની ગયો હતો. ખરાબ હવામાન અને લપસણા રસ્તાના કારણે ચાલકે કાર પરનો કાબૂ ગુમાવતા આ કરૂણ હોનારત સર્જાઈ હોવાનું માનવામાં આવે છે.

સ્થાનિકોએ અકસ્માતનો પ્રચંડ અવાજ સાંભળીને તાત્કાલિક પોલીસ અને વહીવટી તંત્રને જાણ કરી હતી. જાણ થતાની સાથે જ પોલીસ ટીમ અને બચાવ દળ ઘટનાસ્થળે પહોંચ્યા હતા અને ધોધમાર વરસાદ વચ્ચે રાહત કામગીરી શરૂ કરી હતી. ભારે જહેમત બાદ ઈજાગ્રસ્તો અને મૃતદેહોને ખાઈમાંથી બહાર કાઢવામાં આવ્યા હતા. અકસ્માતમાં ગંભીર રીતે ઘાયલ થયેલા 4 પ્રવાસીઓને સારવાર માટે તાત્કાલિક ટાડા મેડિકલ કોલેજ કાંગડા ખાતે ખસેડવામાં આવ્યા હતા.

આ અકસ્માતમાં મૃત્યુ પામેલા લોકોમાં લલિત ફતનાની, સોનિયાબેન, પ્રિયંક ભોપાણી, કાજલ ભોપાણી અને દિવ્યાંશુ ભોપાણીનો સમાવેશ થાય છે. જ્યારે ઇજાગ્રસ્તોમાં મયંક, ફોરમ, જિયાંશ અને પ્રિયાંશીનો સમાવેશ થાય છે. ભાવનગરનો આ સિંધી પરિવાર હિમાચલના કુદરતી સૌંદર્યને માણવા માટે પ્રવાસે નીકળ્યો હતો, પરંતુ પરત ફરતી વખતે કુદરતે આ પરિવાર પર કહેર વર્તાવ્યો હતો. પોલીસ આ મામલે વધુ તપાસ ચલાવી રહી છે.