મુંબઈમાં વરસાદનું આગમન થયા બાદ હવે દક્ષિણ ગુજરાત તરફ ચોમાસું આગળ વધી રહ્યું છે. હવામાન ખાતા દ્વારા જાહેર કરવામાં આવેલા છેલ્લા 24 કલાકના આંકડા અનુસાર, મંગળવારે સવારે 6 વાગ્યાથી બુધવારે સવારે 6 વાગ્યા સુધીમાં સૌથી વધુ વરસાદ વલસાડના ઉમરગામ તાલુકામાં નોંધાયો હતો. ઉમરગામમાં 4.33 ઇંચ વરસાદ ખાબક્યો હતો, જેના કારણે નીચાણવાળા વિસ્તારોમાં પાણી ભરાઈ ગયા હતા.

આ ઉપરાંત રાજ્યના અન્ય વિસ્તારોમાં પણ સારો વરસાદ નોંધાયો હતો. જેમાં ડાંગ જિલ્લા અને તાલુકામાં 3.07 ઇંચ, રાજકોટના ગોંડલ તાલુકામાં 2.13 ઇંચ, વલસાડના કપરાડામાં 1.46 ઇંચ, વલસાડના વાપીમાં 1.42 ઇંચ તેમજ તાપીના ઉકાઈમાં 1.1 ઇંચ વરસાદ પડ્યો હતો.

જ્યારે અન્ય તાલુકાઓની વાત કરીએ તો, રાજકોટના કોટડા સાંગાણીમાં 0.79 મીમી, નર્મદાના સાગબારામાં 0.75 મીમી, પંચમહાલના જાંબુગોડામાં 0.51 મીમી, છોટાઉદેપુરના કાવંટમાં 0.51 મીમી, સુરતના માંડવી તાલુકામાં 0.31 મીમી, બોટાદના રાણપુર તાલુકામાં 0.31 મીમી, ડાંગના સુબીર તાલુકામાં 0.28 મીમી અને નવસારીના ચિખલી તાલુકામાં 0.24 મીમી વરસાદ નોંધાયો હતો.