અમેરિકાના મિયામીમાં 6 સપ્ટેમ્બરે લેન્ડિંગ વખતે વખતે એમેઝોન પ્રાઇમ એર કાર્ગો વિમાન રનવે પરથી ઉતરી જતાં જમીન પરના 5 લોકોનાં મોત નિપજ્યા છે. યુએસ નેશનલ ટ્રાન્સપોર્ટેશન સેફ્ટી બોર્ડ (NTSB)ના ચેરમેન જેનિફર હોમેન્ડીએ 7 સપ્ટેમ્બરે જણાવ્યું હતું કે, તપાસકર્તાઓએ ક્ષતિગ્રસ્ત વિમાનમાંથી ફ્લાઇટ ડેટા રેકોર્ડર અને કોકપિટ વોઇસ રેકોર્ડર મેળવી લીધા છે. વધુ ચકાસણી અર્થે 7 સપ્ટેમ્બરની રાત્રે બંને બ્લેક બોક્સ વોશિંગ્ટન સ્થિત એજન્સીના મુખ્ય મથકે મોકલી દેવાયા છે.

મિયામી સ્થિત 21 એર એલએલસી સંચાલિત આ 32 વર્ષ જૂનું બોઇંગ 767-33 વિમાન રનવે પર અંદાજિત 396 મીટર જેટલું ઢસડાઈ ગયું હતું. આ વિમાને એરપોર્ટના મેદાનમાં સાત સફાઈ કર્મચારીઓથી ભરેલી એક ઇકોનોલિન વાન અને કમ્પાઉન્ડની બહારના રસ્તા પર પસાર થતી ટોયોટા એસયુવીને અડફેટે લીધી હતી.

અધિકારીઓએ 7 સપ્ટેમ્બરે જણાવ્યું હતું કે આ દુર્ઘટનામાં અન્ય 5 લોકો ઘાયલ થયા છે, જેમાં ત્રણની હાલત ગંભીર છે. જોકે, વિમાનમાં સવાર પાઇલટ અને સહ-પાઇલટનો આબાદ બચાવ થયો છે. હોમેન્ડીએ પ્રેસ કોન્ફરન્સમાં સ્પષ્ટ કર્યું હતું કે બંને પાયલોટની હજુ સુધી પૂછપરછ કરવામાં આવી નથી.

મિયામી ઇન્ટરનેશનલ એરપોર્ટ પર 32 સભ્યોની તપાસ ટીમનું નેતૃત્વ કરતા હોમેન્ડીએ પ્રાથમિક વિગતો આપતા કહ્યું કે, તપાસ પૂરી ન થાય ત્યાં સુધી અકસ્માતનું ચોક્કસ કારણ નક્કી કરી શકાશે નહીં. હાલ NTSB દ્વારા પુરાવા એકત્ર કરાઈ રહ્યા છે. દુર્ઘટના સ્થળ અને વિમાનમાંથી જેટ ઇંધણ દૂર કરવાનું કામ ચાલુ હોવાથી, એરપોર્ટના ચારમાંથી બે રનવે હજુ બંધ રાખવામાં આવ્યા છે.