અમેરિકાના ઇડાહો રાજ્યમાં રવિવારે 17 મેના રોજ યોજાયેલા એર શૉ દરમિયાન એક ભયાનક અકસ્માત સર્જાયો હતો. બપોરે માઉન્ટેન હોમ એર ફોર્સ બેઝ પર ગનફાઇટર સ્કાઇઝ એર શૉ ચાલી રહ્યો હતો, ત્યારે સંતુલન બગડવા અથવા સંકલનમાં ખામીને કારણે યુએસ નેવીના 2 ફાઇટર જેટ હવામાં એકબીજા સાથે અથડાઈ ગયા હતા.

આ બંને ફાઇટર જેટ જ્યારે હવાઈ કરતબો બતાવી રહ્યા હતા ત્યારે આ ઘટના બની હતી. ટક્કર બાદ થોડી જ વારમાં બંને વિમાન આગના ગોળામાં રૂપાંતરિત થઈ ગયા હતા અને જમીન પર પડી ગયા હતા. આ અકસ્માતમાં સામેલ વિમાન યુએસ નેવીના EA-18G ગ્રોલર્સ હતા. સદનસીબે બંને વિમાનમાં સવાર ચારેય ક્રૂ સભ્યો સુરક્ષિત રીતે બહાર નીકળવામાં સફળ રહ્યા હતા. બેઝના અધિકારીઓના જણાવ્યા અનુસાર, ચારેય વ્યક્તિઓની હાલત હાલમાં સ્થિર છે અને દર્શકો કે જમીન પર રહેલા લશ્કરી કર્મચારીઓને કોઈ ઈજા થઈ નથી.

મીડિયા અહેવાલો મુજબ, 8 વર્ષ બાદ પહેલી વાર રવિવારે આ ગનફાઇટર સ્કાઇઝ એર શૉ યોજાઈ રહ્યો હતો. અગાઉ 2018 માં યોજાયેલા છેલ્લા શૉ દરમિયાન પણ એક અકસ્માત થયો હતો, જેમાં એક હેંગ-ગ્લાઇડર પાઇલટે પોતાનો જીવ ગુમાવ્યો હતો. આ ભયાનક ઘટનાનો વીડિયો સોશિયલ મીડિયા પર વાયરલ થઈ રહ્યો છે. જોકે, અત્યાર સુધી ફાયર વિભાગ, પોલીસ કે ઇમરજન્સી મેનેજમેન્ટ અધિકારીઓ તરફથી આ ઘટના અંગે કોઈ સત્તાવાર પ્રતિક્રિયા આપવામાં આવી નથી.