દક્ષિણ અમેરિકાના દેશ ઇક્વાડોરમાંથી માનવતાને શર્મસાર કરતી એક અત્યંત ભયાનક ઘટના સામે આવી છે. મનાબી પ્રાંતના પ્યુર્ટો લોપેજ વિસ્તારમાં પ્રવાસીઓથી ધમધમતા સમુદ્ર કિનારે પાંચ લોકોના કપાયેલા માથા દોરડાથી લટકાવેલી હાલતમાં મળી આવતા સમગ્ર વિસ્તારમાં ફાળ પડી ગઈ છે.

સ્થાનિક હોટલ નજીક બનેલી આ ઘટનામાં ગુનેગારોએ માત્ર હત્યા જ નથી કરી, પરંતુ લાશના માથા પાસે સ્પેનિશ ભાષામાં એક મોટું વૉર્નિંગ બોર્ડ પણ મૂક્યું હતું. જેના પર લખ્યું હતું: “આ અમારું ગામ છે. માછીમારોને લૂંટવાનું બંધ કરો. અમે તમને ઓળખી લીધા છે.” આ મેસેજ પરથી સ્પષ્ટ થાય છે કે આ કૃત્ય લૂંટ અને જબરદસ્તી વસૂલાત કરનારા તત્વોને ધમકાવવા માટે કરવામાં આવ્યું છે.

પોલીસ અને તપાસ એજન્સીઓના મતે, આ હિંસા પાછળ ડ્રગ કાર્ટેલ અને ગુનાહિત ગેંગો વચ્ચેનો વર્ચસ્વનો જંગ જવાબદાર છે. ડ્રગ તસ્કરો કોલંબિયા અને પેરૂની સરહદેથી નશીલા પદાર્થો લાવવા માટે માછીમારો અને તેમની નૌકાઓનો ગેરકાયદેસર ઉપયોગ કરે છે. આ વિસ્તારમાં ડ્રગ તસ્કરીના માર્ગો પર કબજો મેળવવા માટે ગેંગો વચ્ચે અવારનવાર આવા નરસંહાર થતા રહે છે.