IPL 2026ની 51મી મેચમાં શુક્રવારે કોલકાતા નાઈટ રાઈડર્સ (KKR)એ દિલ્હી કેપિટલ્સને તેના જ ઘર આંગણે 8 વિકેટે કારમી હાર આપી છે. દિલ્હીના અરુણ જેટલી સ્ટેડિયમમાં રમાયેલી આ મેચમાં ફિન એલેનની વિસ્ફોટક સદીના જોરે કોલકાતાએ સતત ચોથી જીત નોંધાવી છે. પ્લેઓફની રેસમાં ટકી રહેવા માટે બંને ટીમો માટે આ જીત અત્યંત મહત્ત્વની હતી. 143 રનના લક્ષ્યાંકનો પીછો કરવા ઉતરેલી કોલકાતાની શરૂઆત નબળી રહી હતી. કેપ્ટન અજિંક્ય રહાણે 13 રને રનઆઉટ થયો હતો અને અંગક્રિશ રઘુવંશી માત્ર 1 રન બનાવી અક્ષર પટેલનો શિકાર બન્યો હતો. 31 રનમાં 2 વિકેટ ગુમાવ્યા બાદ 'ઇમ્પેક્ટ પ્લેયર' તરીકે આવેલા ફિન એલેને મેદાન ગજવ્યું હતું.  એલેને માત્ર 47 બોલમાં 10 છગ્ગા અને 5 ચોગ્ગાની મદદથી અણનમ 100 રન બનાવ્યા હતા. તેને કેમરન ગ્રીનનો સાથ મળ્યો, જેણે 2 છગ્ગા સાથે અણનમ 33 રન ફટકાર્યા હતા. KKR એ માત્ર 14.2 ઓવરમાં જ લક્ષ્યાંક હાંસલ કરી લીધો હતો. આ પહેલા ટોસ હારીને પ્રથમ બેટિંગ કરવા ઉતરેલી દિલ્હી કેપિટલ્સની શરૂઆત શાનદાર રહી હતી. કેએલ રાહુલ (23 રન) અને પથુમ નિસંકા (50 રન) એ પ્રથમ વિકેટ માટે 49 રન જોડ્યા હતા. જોકે, રાહુલ આઉટ થયા બાદ દિલ્હીની બેટિંગ લાઇન-અપ પત્તાના મહેલની જેમ વિખેરાઈ ગઈ હતી. એક સમયે 1 વિકેટે 74 રન કરનાર દિલ્હીનો સ્કોર જોતજોતામાં 89/5 થઈ ગયો હતો. અક્ષર પટેલે 11 અને આશુતોષ શર્માએ 39 રનનું યોગદાન આપી ટીમને 8 વિકેટે 142 રનના સન્માનજનક સ્કોર સુધી પહોંચાડી હતી. KKR તરફથી અનુકૂલ રોય અને કાર્તિક ત્યાગીએ ધારદાર બોલિંગ કરી હતી.