IPL 2025માં રવિવારે લખનઉ સુપર જાયન્ટ્સ અને મુંબઈ ઈન્ડિયન્સ વચ્ચે મેચ રમાઈ હતી. આ મેચમાં મુંબઈ ઈન્ડિયન્સે શાનદાર જીત નોંધાવી અને લખનઉને 54 રનથી હરાવી દીધું. આ મેચમાં ફરી એકવાર રિષભ પંત બેટિંગમાં ફ્લોપ નજર આવ્યો અને બીજી તરફ તેની કેપ્ટન્સી પર પણ સવાલ ઉઠ્યા છે.  આ મેચમાં લખનઉની ટીમે ટોસ જીતીને પહેલા બોલિંગ કરવાનો નિર્ણય લીધો હતો. પરંતુ જ્યારે કેપ્ટન પંતે પોતાની પ્લેઈંગ ઈલેવનનો ઉલ્લેખ કર્યો ત્યારે બધા હેરાન રહી ગયા. પંતે શાર્દુલ ઠાકુરને પડતો મૂક્યો જ્યારે તેના સ્થાને મયંક યાદવને તક આપી. આ ત્યારે થયું જ્યારે શાર્દુલ અત્યાર સુધી LSG માટે 12 વિકેટ લઈ ચૂક્યો છે. બીજી તરફ આ મેચમાં મયંક યાદવે 4 ઓવરમાં 40 રન ખર્ચ્યા. જોકે, તેને બે સફળતા પણ મળી. પરંતુ શાર્દુલ બોલિંગની સાથે બેટિંગનો પણ વિકલ્પ આપે છે. બીજી તરફ પંત પોતાના બેટિંગ ક્રમને જ નથી સમજી શકતો. છેલ્લી મેચમાં જ્યારે લખનઉને ઝડપથી રન બનાવવાની જરૂર હતી, ત્યારે તે છેલ્લા બે બોલ પર બેટિંગ કરવા આવ્યો હતો. તેની આટલા નીચા બેટિંગ ક્રમ પર પણ સવાલો ઉઠ્યા હતા. બીજી તરફ હવે આ મેચમાં તે શરૂઆતમાં બેટિંગ કરવા આવ્યો હતો. ત્યારે લખનઉ સારી સ્થિતિમાં હતું. પરંતુ પંતે ફરી એકવાર વિચિત્ર શોટના ચક્કરમાં પોતાની વિકેટ ગુમાવી દીધી, જ્યારે તે સમય લઈ શકતો હતો.  મુંબઈએ પહેલા બેટિંગ કરીને લખનઉને 216 રનનો ટાર્ગેટ આપ્યો હતો. જવાબમાં જ્યારે લખનઉ ટાર્ગેટ ચેઝ કરવા ઉતરી તો તેની શરૂઆત સારી હતી. લખનઉએ 6 ઓવરમાં 60 રન બનાવ્યા હતા અને બે વિકેટ ગુમાવી દીધી હતી. ત્યારબાદ પંત બેટિંગ કરવા આવ્યો. તેણે પહેલા બોલ પર ચોગ્ગો ફટકાર્યો પરંતુ બીજા બોલ પર, તે એક વિચિત્ર શોટ રમવાનો પ્રયાસ કરતી વખતે આઉટ થઈ ગયો. 27 કરોડની મોટી કિંમત અને ટીમનો ભાર ઉઠાવનાર ખેલાડી પાસેથી આવા નબળા સમયે આવો શોટ રમવાની અપેક્ષા નહોતી.