નવી દિલ્હીઃ આઈપીએલની ડિફેન્ડિંગ ચેમ્પિયન અને સૌથી ચર્ચિત ટીમોમાંની એક રોયલ ચેલેન્જર્સ બેંગલુરુ (RCB) હવે નવા માલિકોના હાથમાં ગઈ છે. આદિત્ય બિરલા ગ્રુપ, ટાઈમ્સ ઓફ ઈન્ડિયા ગ્રુપ, બોલ્ટ વેન્ચર્સ અને બ્લેકસ્ટોનના કન્સોર્ટિયમે ટીમને 1.78 બિલિયન ડોલર (આશરે ₹16,600 કરોડ)માં ખરીદી લીધી છે. નોંધનીય છે કે આ ડીલ પહેલાં રાજસ્થાન રોયલ્સ પણ આશરે ₹15,000 કરોડમાં વેચાઈ હતી, એટલે માત્ર 24 કલાકમાં જ બે મોટી આઈપીએલ ટીમોની માલિકી બદલાઈ ગઈ છે.

આરસીબીની ડીલ યુનાઈટેડ સ્પિરિટ્સ લિમિટેડ સાથે થઈ હોવાનું જણાવાયું છે, જેમાં ટીમનો 100 ટકા હિસ્સો ટ્રાન્સફર થશે. આ ડીલમાં પુરુષ ટીમ સાથે મહિલા ટીમ પણ સામેલ છે, એટલે બંને ટીમોની માલિકી હવે આ ચારેય કંપનીઓ પાસે રહેશે.

નવા માળખા મુજબ આદિત્ય બિરલા ગ્રુપના આર્યમાન વિક્રમ બિરલા ચેરમેન બનશે, જ્યારે ટાઈમ્સ ગ્રુપના સત્યાન ગજવાની વાઈસ ચેરમેન તરીકે જવાબદારી સંભાળશે. ઉપરાંત બોલ્ટ વેન્ચર્સના ડેવિડ બ્લિત્ઝર અને બ્લેકસ્ટોનના વિરલ પટેલ પણ કન્સોર્ટિયમમાં સામેલ છે. જોકે આ ડીલને અમલી બનવા માટે BCCI, કોમ્પિટિશન કમીશન ઓફ ઈન્ડિયા સહિતની રેગ્યુલેટરી સંસ્થાઓની મંજૂરી મળવાની બાકી છે.