ઝારખંડની રાજધાની રાંચીમાં સરકારી ભરતી પરીક્ષાઓમાં થયેલી કથિત ગેરરીતિઓ અને પેપર લીકના વિરોધમાં વિદ્યાર્થીઓનું આંદોલન અત્યંત ઉગ્ર બની ચૂક્યું છે. રાંચીના જયપાલ સિંહ મુંડા સ્ટેડિયમ ખાતેથી શરૂ થયેલો આક્રોશ વિધાનસભા ઘેરાવ સુધી પહોંચ્યો હતો. પ્રદર્શનકારીઓ અને પોલીસ વચ્ચે હિંસક અથડામણ બાદ હવે પોલીસ તંત્ર દ્વારા કાનૂની શિકંજો કસાયો છે.

વિદ્યાર્થી નેતાઓની આગેવાની હેઠળ હાથ ધરાયેલા વિધાનસભા ઘેરાવ કાર્યક્રમ દરમિયાન સ્થિતિ કાબૂ બહાર ગઈ હતી. હજારોની સંખ્યામાં એકઠા થયેલા વિદ્યાર્થીઓએ સુરક્ષા માટે લગાવેલા બેરિકેડ્સ તોડી પાડી આગળ વધવાનો પ્રયાસ કર્યો હતો. સ્થિતિને નિયંત્રણમાં લેવા પોલીસે વોટર કેનન અને લાઠીચાર્જનો સહારો લેવો પડ્યો હતો. આ દરમિયાન રોષે ભરાયેલા પ્રદર્શનકારીઓ દ્વારા પોલીસ વાહનો પર પથ્થરમારો કરાયો હતો.

ઘટના બાદ વહીવટી તંત્રે આકરા પગલાં લેતા રાંચીમાં બે અલગ-અલગ જગ્યાએ ગુનો નોંધ્યો છે. પોલીસ પર પથ્થરમારો કરવા, બેરિકેડિંગ તોડવા, સરકારી વાહનોને નુકસાન પહોંચાડવા અને સરકારી કામકાજમાં અડચણ ઊભી કરવા બદલ 100 નામજોગ અને 500 અજાણ્યા મળી કુલ 600 લોકો સામે FIR દાખલ કરાઈ છે.

આ ઉપરાંત અખિલ ભારતીય વિદ્યાર્થી પરિષદની માર્ચ દરમિયાન થયેલી અનિશ્ચિતતા બદલ લાલપુર પોલીસ સ્ટેશનમાં મેજિસ્ટ્રેટની ફરિયાદ આધારે અલગથી કાનૂની ગુનો નોંધાયો છે. પોલીસ જવાનો અને પ્રદર્શનકારીઓ ઘાયલ થયાના અહેવાલ છે. પોલીસ દ્વારા વધુ તપાસ ચાલી રહી છે.