અમેરિકન પ્રમુખ ડોનાલ્ડ ટ્રમ્પે H-1B વિઝા માટેના નિયમોમાં ફેરફાર કર્યો છે. કેટલાક H-1B વિઝા ધારકો હવે નોન-ઇમિગ્રન્ટ વર્કર તરીકે સીધા અમેરિકામાં નહીં પ્રવેશી શકે. દરેક નવી અરજી સાથે 100,000 ડૉલર એટલે કે 88 લાખ રૂપિયાથી વધુની ફી ચૂકવવાની રહેશે. હવે દરેકના મનમાં એક જ સવાલ છે કે, ડોનાલ્ડ ટ્રમ્પે રાતોરાત H1-B વિઝાની ફી આટલી બધી કેમ વધારી દીધી? હવે વ્હાઈટ હાઉસે આના જવાબમાં એક ફેક્ટ શીટ જાહેર કરી છે.

વ્હાઈટ હાઉસની આ ફેક્ટ શીટ પ્રમાણે ઘણી અમેરિકન કંપનીઓ H1-B વીઝા દ્વારા અન્ય દેશોમાંથી આવેલા લોકોને ઓછી સેલેરીમાં કામ આપે છે અને મોટી સંખ્યામાં અમેરિકન્સને નોકરીમાંથી કાઢી મૂક્યા.
વ્હાઈટ હાઉસનું કહેવું છે કે, 2023માં IT ક્ષેત્રમાં H1-B વીઝાની માગ 32% હતી, જે હવે વધીને 65% થઈ ગઈ છે. આ પરથી જાણી શકાય કે, H1-B વીઝાના કારણે અમેરિકન યુવાઓમાં બેરોજગારી વધી રહી છે. વ્હાઈટ હાઉસની ફેક્ટ શીટ પ્રમાણે તાજેતરમાં જ કમ્પ્યુટર સાયન્સમાં સ્નાતક કરનારા 6.1%  યુવા બેરોજગાર છે અને કમ્પ્યુટર એન્જિનિયરિંગ કરનારા 7.5% યુવાઓ પાસે નોકરી નથ. ઈતિહાસ સહિત અન્ય વિષયોમાં આ આંકડા વધુ છે. વ્હાઈટ હાઉસની ફેક્ટ શીટમાં દાવો કરવામાં આવ્યો છે કે, STEM ક્ષેત્રોમાં માત્ર 44.5% નોકરીમાં જ વધારો થયો છે. જોકે, જોકે, 2000-2019ની વચ્ચે STEM ક્ષેત્રોમાં વિદેશીથી આવતા કર્મચારીઓની સંખ્યા બમણી થઈ ગઈ છે.