ભારતીય જનતા પાર્ટી (BJP)એ બિહાર સરકારમાં મંત્રી નીતિન નબિનને પાર્ટીના રાષ્ટ્રીય કાર્યકારી અધ્યક્ષ તરીકે નિયુક્ત કરીને સૌને ચોંકાવી દીધા છે. રસપ્રદ વાત એ છે કે 1980માં સ્થપાયેલી BJPમાં 45 વર્ષની ઉંમરના નીતિન નબિન હવે 45 વર્ષની પાર્ટીના અધ્યક્ષ બન્યા છે. આ નિમણૂક સાથે તેઓ કેન્દ્રીય ગૃહમંત્રી અમિત શાહનો પણ રેકોર્ડ તોડશે.

નીતિન નબિનનો જન્મ 23 મે, 1980ના રોજ થયો હતો, જ્યારે BJP ની સ્થાપના 6 એપ્રિલ, 1980ના રોજ થઈ હતી. તેઓ BJPના ઇતિહાસમાં સૌથી યુવા અધ્યક્ષ બન્યા છે. અગાઉ અમિત શાહ જુલાઈ 2014માં જ્યારે રાષ્ટ્રીય અધ્યક્ષ બન્યા ત્યારે તેમની ઉંમર 49 વર્ષ અને 9 મહિના હતી. તેના વિપરીત નીતિન નબિન માત્ર 45 વર્ષની ઉંમરે આ જવાબદારી સંભાળી રહ્યા છે, જેના કારણે તેઓ અમિત શાહનો રેકોર્ડ તોડીને સૌથી યુવા રાષ્ટ્રીય કાર્યકારી અધ્યક્ષ બન્યા છે.

નીતિન નબિન બિહારના રાજકારણમાં એક પરિચિત ચહેરો છે. તેઓ હાલમાં બિહાર સરકારમાં પથ નિર્માણ અને નગર વિકાસ તેમજ આવાસ વિભાગના મંત્રી તરીકેની જવાબદારી સંભાળી રહ્યા છે. તેઓ સતત પાંચ વખત ધારાસભ્ય તરીકે ચૂંટાયા છે અને જનતા વચ્ચે લાંબા સમયથી કામ કરવાનો બહોળો અનુભવ ધરાવે છે.