અમેરિકાના વ્હાઇટ હાઉસમાં બે પ્રતિષ્ઠિત વ્યક્તિ વચ્ચેની બેઠક અત્યારે ચર્ચાનો વિષય બની છે. શુક્રવારના રોજ વ્હાઇટ હાઉસમાં બે કટ્ટર રાજકીય હરીફ ગણાતા ટ્રમ્પ અને ન્યુયોર્ક શહેરના ચૂંટાયેલા મેયર ઝોહરાન મમદાની વચ્ચે બેઠક યોજાઈ હતી. આ બેઠકમાં અમેરિકાના રાષ્ટ્રપતિ ટ્રમ્પના આકરા તેવર જોવા મળ્યા. ટ્રમ્પે મમદાનીને અનેક વખત ગરમ સ્વરમાં સંબોધિત કર્યા જ્યારે મમદાનીએ સ્થાનિક કાયદાઓ, માનવ અધિકારો અને આંતરરાષ્ટ્રીય નીતિ પર તેમના સ્પષ્ટ વલણનો પુનરોચ્ચાર કર્યો.

વ્હાઇટ હાઉસમાં રાષ્ટ્રપિત ડોનાલ્ડ ટ્રમ્પ અને મેયર ઝોહરાન મમદાની વચ્ચે પ્રથમ ઔપચારિક બેઠક યોજાઈ હતી. દરમિયાન બંને નેતાઓએ ગુના, સ્થળાંતર, સુરક્ષા અને રહેઠાણ જેવા મુદ્દાઓ પર સહયોગનું વચન આપ્યું હતું. એક સમયે એકબીજા પર કાદવ ઉછાળનારા મમદાની અને ટ્રમ્પ પ્રથમ મુલાકાતમાં સૌહાર્દપૂર્ણ ઔપચારિક વાતચીતથી શરૂઆત કરી હતી. બાદમાં ધીરેધીરે ટ્રમ્પ મમદાની તરફ આક્રમક બનવા લાગ્યા. ઝોહરાન મમદાનીએ એક પ્રશ્નનો જવાબ આપતા હતા ત્યારે ટ્રમ્પે તેમને અટકાવતા કહ્યું, "કોઈ વાંધો નહીં, ફક્ત સીધું કહો. સમજાવવા કરતાં તે સરળ છે. મને કોઈ વાંધો નથી."

વાસ્તવમાં, ટ્રમ્પે આ વાત ત્યારે કહી જ્યારે મમદાનીને પૂછવામાં આવ્યું કે શું તેઓ રાષ્ટ્રપતિ ટ્રમ્પને 'ફાસીવાદી' માને છે. આ વાતચીતને બંને વચ્ચે બદલાતા સમીકરણના સંકેત તરીકે જોવામાં આવી રહી છે. ટ્રમ્પે બાદમાં એક સોશિયલ મીડિયા પોસ્ટમાં લખ્યું, "ન્યૂ યોર્ક શહેરના નવા મેયર ઝોહરાન મમદાનીને મળવું ખૂબ જ સન્માનની વાત છે!" "જો રસ્તાઓ સુરક્ષિત નહીં હોય, તો તમે સફળતા મેળવી શકશો નહીં."