અમેરિકી સુપ્રીમ કોર્ટ દ્વારા રાષ્ટ્રપતિ ડોનાલ્ડ ટ્રમ્પ દ્વારા વિશ્વના વિવિધ દેશો પર લાદવામાં આવેલા ટેરિફને 'ગેરકાયદેસર' જાહેર કરવામાં આવ્યા છે. આ નિર્ણય બાદ ભારતને મોટી રાહત મળી છે. અગાઉના ટેરિફ રદ થયા પછી, રાષ્ટ્રપતિ ડોનાલ્ડ ટ્રમ્પે એક અન્ય નિયમ હેઠળ તમામ દેશો પર 10 ટકા ટેરિફની જાહેરાત કરી છે.

આ જાહેરાત બાદ એવા સવાલો ઉઠી રહ્યા હતા કે, શું ભારત જેવા દેશો, જેઓ અમેરિકા સાથે 'ટ્રેડ ડીલ' પર સહમતિ સાધી ચૂક્યા છે, તેમના ઉત્પાદનોને આ નવા ટેરિફમાં સ્થાન મળશે કે નહીં? પરંતુ થોડી જ વારમાં અમેરિકી વહીવટીતંત્રે સ્પષ્ટ કર્યું કે, જે દેશો સાથે ટ્રેડ ડીલ થઈ ચૂકી છે અથવા સહમતિ બની છે, તેમના પર પણ હવે સમાન રીતે 10 ટકા ટેરિફ લાગુ કરવામાં આવશે. આ અગાઉ, ટ્રેડ ડીલ હેઠળ અમેરિકાએ ભારતીય ઉત્પાદનો પર 18 ટકા ટેરિફ લગાવવાની વાત કરી હતી.

વ્હાઇટ હાઉસના અધિકારીઓએ ન્યૂઝ ચેનલ ‘CNBC’ ને સ્પષ્ટતા કરી છે કે, ભારત પર ટેરિફનો દર 18 ટકાથી ઘટીને 10 ટકા થઈ ગયો છે. આ ટ્રમ્પના નવા 10 ટકા વૈશ્વિક ટેરિફની વ્યાખ્યા કરે છે. CNBC ના સંવાદદાતા એમોન જાવેર્સે ભારત સહિતના તમામ ટ્રેડ ડીલ ધરાવતા દેશો પરના 10 ટકા ટેરિફ અંગે વિગતવાર માહિતી આપી છે.