દેશના અનેક વિસ્તારોમાં ચોમાસું ફરી રૌદ્ર સ્વરૂપ ધારણ કરી રહ્યું છે. બંગાળની ખાડી ઉપર સર્જાયેલા ગંભીર દબાણ એટલે કે ડીપ ડિપ્રેશનના કારણે પૂર્વીય, મધ્ય અને દક્ષિણ ભારતના અનેક રાજ્યોમાં હવામાનનો મિજાજ બદલાયો છે. ભારતીય હવામાન વિભાગના જણાવ્યા અનુસાર આ સિસ્ટમ ગતિશીલ બની જમીન સાથે ટકરાવા જઈ રહી છે, જેના કારણે આગામી દિવસોમાં ભારેથી અતિભારે વરસાદની ચેતવણી અપાઈ છે.

હવામાન વિભાગની ચેતવણીને પગલે ઓડિશામાં સૌથી વધુ અસર જોવા મળી રહી છે. તટીય અને દક્ષિણી વિસ્તારોમાં ધોધમાર વરસાદ વરસી રહ્યો છે. સંભવિત આપત્તિને પહોંચી વળવા રાજ્ય સરકારે 33 ઓડ્રાફ ટીમો તૈનાત કરી છે, જેમાંથી 24 ટીમો અત્યંત સંવેદનશીલ જિલ્લાઓમાં મોકલાઈ છે. પરિસ્થિતિની ગંભીરતા જોતા 7 જિલ્લાઓમાં શૈક્ષણિક સંસ્થાઓ 24 સપ્ટેમ્બર સુધી બંધ રાખવાનો આદેશ અપાયો છે.

કટોકટીના પગલે તમામ સરકારી કર્મચારીઓની રજાઓ રદ કરી ડ્યુટી પર હાજર રહેવા સૂચના અપાઈ છે. દરિયાકાંઠે 75 કિલોમીટર પ્રતિ કલાકની ઝડપે પવન ફૂંકાય તેવી શક્યતા હોવાથી 24 સપ્ટેમ્બર સુધી માછીમારોને દરિયામાં ન જવા અને પુરીના દરિયાકિનારે નાહવા પર સંપૂર્ણ પ્રતિબંધ મૂકાયો છે.

ઉત્તર ભારતમાં પણ હવામાન પલટાના સંકેત છે. પૂર્વીય યુપીમાં ગુરુવારથી ગાજવીજ સાથે વરસાદ શરૂ થશે અને 25-26 સપ્ટેમ્બર દરમિયાન ભારે વરસાદનું અનુમાન છે. ઉત્તરાખંડમાં શુક્રવારથી જોર વધીને શનિવારે પર્વતીય વિસ્તારોમાં અતિભારે વરસાદ પડી શકે છે. બિહારમાં ગુરુવાર અને શુક્રવારે ભારેથી અતિભારે વરસાદની સંભાવના છે. દિલ્હી-એનસીઆરમાં બુધવારે હવામાન સૂકું રહેશે અને કોઈ મોટું એલર્ટ નથી, મહત્તમ તાપમાન 34થી 36 ડિગ્રી રહેશે. છત્તીસગઢ, મધ્ય પ્રદેશ, વિદર્ભ, તટીય કર્ણાટક, આંધ્ર પ્રદેશ અને તેલંગાણામાં પણ ભારેથી અતિભારે વરસાદની આગાહી છે.