હવામાન વિભાગે હિમાચલ પ્રદેશ, ઉત્તરાખંડ અને પંજાબમાં ભારે વરસાદની ચેતવણી જારી કરી છે. બીજી તરફ, જમ્મુ-કાશ્મીરના ઘણા ભાગોમાં સતત વરસાદ પડી રહ્યો છે. હવામાન વિભાગે મુશળધાર વરસાદની ચેતવણી જારી કરી છે. તાજેતરમાં જમ્મુ-કાશ્મીરના રામબન જિલ્લાના એક દૂરના ગામમાં વાદળ ફાટવાથી ત્રણ લોકોના મોત થયા હતા, જ્યારે બે અન્ય ગુમ થયા હતા. વાદળ ફાટવાના કારણે, જિલ્લા મુખ્યાલયથી લગભગ 25 કિમી દૂર આવેલા પહાડી રાજગઢમાં અચાનક પૂર આવ્યું હતું.

હરિયાણા અને પંજાબના ઘણા જિલ્લાઓમાં વાવાઝોડા, વીજળી અને વરસાદ ચાલુ છે. હવામાન વિભાગ (IMD) એ સોમવારે ભારે વરસાદની આગાહી પણ જારી કરી છે. IMD એ જણાવ્યું હતું કે કરનાલ, પાણીપત, અંબાલા, ચંદીગઢ સહિત ઘણા જિલ્લાઓમાં વીજળીના કડાકા અને ગાજવીજ સાથે ભારે વરસાદની શક્યતા છે. ઉપરાંત, ઘણા જિલ્લાઓમાં પવનની ગતિ 30 થી 40 કિલોમીટર પ્રતિ કલાક સુધી પહોંચી શકે છે. હવામાન વિભાગે પર્વતોમાં વિનાશની ચેતવણી જાહેર કરી છે.

હવે સપ્ટેમ્બરમાં પણ વરસાદના વિનાશની ચેતવણી જારી કરવામાં આવી છે. હવામાન વિભાગે સોમવારે કાંગરા, મંડી, ઉના, બિલાસપુર, હમીરપુર અને સિરમૌરમાં ભારે વરસાદ માટે રેડ એલર્ટ જારી કર્યું છે, આ ઉપરાંત ચંબા, કુલ્લુ, શિમલા, કિન્નૌર અને લાહૌલ સ્પીતિ માટે ઓરેન્જ એલર્ટ અને સોલનમાં વરસાદ માટે યલો એલર્ટ જાહેર કરવામાં આવ્યુ છે.