હિમાચલ પ્રદેશમાં આજે વહેલી સવારે ધરા ધ્રુજી છે. 04:37 વાગ્યે 4.1ની તીવ્રતાનો ભૂકંપ નોંધાયો હતો. સવારે લોકો ઊંઘમાં હતા ત્યારે આંચકા આવ્યા હતા. ભૂકંપનું કેન્દ્રબિંદુ શિમલામાં નોંધાયું હતું, જેની ઊંડાઈ 10 કિમી નોંધાઈ છે. આ ભૂકંપની સૌથી વધારે અસર શિમલા અને સોલનના વિસ્તારમાં રહી હોવાનું સૂત્રો દ્વારા જાણવા મળ્યું છે. શિમલા અને સોલન સાથે ઉત્તરના કેટલાક વિસ્તારોમાં પણ આંચકા અનુભવાયા હતા. આંચકા આવતા લોકો ઘરની બહાર દોડી આવ્યા હતા. ભૂકંપના કારણે કોઈ જાનમાલને નુકસાન થયું હોય તેવા સમાચાર મળ્યા નથી.

4.1ની તીવ્રતાના કારણે મોટાભાગે કોઈ નુકસાન નથી થયું, પરંતુ ચિંતાની વાત એ છે કે પહાડી વિસ્તારમાં 5ની તીવ્રતાનો ભૂકંપ મોટી તારાજી સર્જી શકે છે. 4.5 કે તેથી વધુ તીવ્રતાના ભૂકંપથી જાનમાલનું નુકસાન થઈ શકે છે અને ઘરો, ઈમારતોને નુકસાન પહોંચી શકે છે.

પાંચ દિવસ પહેલાં પણ હિમાચલ પ્રદેશમાં ભૂકંપ આવ્યો હતો. નેશનલ સેન્ટર ફોર સિસ્મોલોજી અનુસાર આ ભૂકંપનું કેન્દ્રબિંદુ ચંબામાં 5 કિલોમીટરની ઊંડાઈએ હતું. ચંબા વિસ્તારમાં અગાઉ પણ હળવા તીવ્રતાના ભૂકંપ અનુભવાયા છે. તાજેતરનો આ ભૂકંપ સોમવારે સાંજે 04:40 વાગ્યે અનુભવાયો હતો.