ગુવાહાટીઃ પત્ની રિયા તાલુકદારની હત્યા કરી તેનું કાપેલું માથું ફ્રિજમાં છુપાવવાના આરોપી રામાનુજ ગોસ્વામીનું પોલીસ કસ્ટડીમાં મોત થયું છે. સોમવારે તેને હાટીગાંવ પોલીસ સ્ટેશનથી ગુવાહાટી મેડિકલ કોલેજ એન્ડ હોસ્પિટલ લઈ જવાતો હતો ત્યારે પોલીસ વાહનમાંથી કૂદકો માર્યો હતો. પોલીસના જણાવ્યા મુજબ, રસ્તામાં વાહનનું ટાયર પંચર થતાં તેને બદલવામાં આવ્યું હતું.

ટાયર બદલ્યા બાદ વાહન શરૂ થતાં જ રામાનુજે એક કોન્સ્ટેબલને લાત મારી અને અચાનક કૂદકો માર્યો હતો. તેણે ઢાળ પરથી નીચે જવાનો પ્રયાસ કરતાં ગંભીર ઈજા થઈ હતી. પોલીસે તેને કાબૂમાં લઈ હોસ્પિટલ પહોંચાડ્યો હતો, જ્યાં તબીબોએ મૃત જાહેર કર્યો. આરોપીની હથકડી પકડી રહેલા કોન્સ્ટેબલને પણ ઈજા થઈ હતી. આરોપીને સવારે 3:41 વાગ્યે મૃત હાલતમાં હોસ્પિટલ લાવવામાં આવ્યો હતો.

પોલીસના જણાવ્યા મુજબ, રામાનુજે ગયા અઠવાડિયે આત્મસમર્પણ કરીને પત્નીની હત્યાની કબૂલાત કરી હતી અને તેની ધરપકડ કરવામાં આવી હતી. કથિત રીતે પત્નીના લગ્નેતર સંબંધની શંકાને કારણે તેણે હત્યા કરી હોવાનું જણાવ્યું હતું. તપાસ દરમિયાન રિયાનું કાપેલું માથું પોલિથીન બેગમાં ફ્રિજમાંથી મળી આવ્યું હતું. બંનેનાં લગ્નને હજુ એક વર્ષ પણ પૂર્ણ થયું નહોતું.

આરોપીને દર 24 કલાકે તબીબી તપાસ કરાવવાની હોવાથી અસ્વસ્થતાની ફરિયાદ બાદ તેને રાત્રે લગભગ 2 વાગ્યે હોસ્પિટલ લઈ જવાતો હતો. આ દરમિયાન તેણે પોલીસ વાહનમાંથી કૂદકો માર્યો હતો. જોકે, તેના મોતનું ચોક્કસ કારણ હજુ સ્પષ્ટ થયું નથી અને સમગ્ર મામલે પોલીસ તપાસ ચાલી રહી છે.