નવી દિલ્હી: યુએસ રશિયા સાથે વેપાર કરતા દેશો પર સતત દબાણ વધારી રહ્યું છે, રશિયા પાસેથી પેટ્રોલિયમ ખરીદવા બદલ યુએસએ ભારત 25 ટકા વધારાના ટેરીફ પણ ઝીંક્યો હતો. એવામાં અહેવાલ છે કે યુએસનો આ દાવ સફળ થઇ રહ્યો છે. આંકડા મુજબ, જાન્યુઆરી મહિનામાં રશિયાથી ભારતમાં આયાતમાં 40.48% ઘટાડો નોંધાયો છે. અહેવાલ મુજબ જાન્યુઆરી 2025 માં ભારતે રશિયા પાસેથી $4.81 બિલિયનના માલસામાનની આયાત કરી હતી, જે જાન્યુઆરી 2026માં $2.86 બિલિયન થઈ ગઈ છે, જે વાર્ષિક ધોરણે 40.48% ઘટાડો દર્શાવે છે. 

ભારતીય રિફાઇનરીઓએ રશિયન ક્રૂડ ખરીદીમાં ભારે ઘટાડો કર્યો હોવાથી આ કુલ આયાતમાં મોટો ઘટડો નોંધાયો છે. નોંધનીય છે કે ભારત રશિયા પસેથી જેટલી આયાત કરે છે, તેમાં પેટ્રોલિયમ ક્રૂડનો હિસ્સો લગભગ 80% હોય છે.  ક્રૂડ ઉપરાંત ભારત રશિયાથી કોલસો, કોક, પેટ્રોલિયમ ઉત્પાદનો, ખાતર, લોખંડ, ન્યૂઝપ્રિન્ટ, કઠોળ, મોતી, કિંમતી અને અર્ધ-કિંમતી પથ્થરોની આયાત કરે છે.ભારત સરકારે સોમવારે જાન્યુઆરી 2026નો  ટ્રેડ ડેટા જાહેર કર્યો હતો, પરંતુ હજુ સુધી પ્રોડક્ટ મુજબ માહિતી જાહેર કરવામાં આવી નથી.