પાકિસ્તાનના ખૈબર પખ્તૂનખ્વાંમાં જાહેર આરોગ્ય ઇજનેરી મંત્રી ફઝલ શકુર ખાનનું ધોળા દિવસે અજાણ્યા નકાબધારી હથિયારબંધ શખ્સોએ અપહરણ કર્યું હતું. ઘટનાથી સમગ્ર વિસ્તારમાં ભારે હડકંપ મચ્યો છે. નકાબધારીઓ એકે-47 સહિતનાં હથિયારો સાથે રસ્તા પર મંત્રીની કાર રોકતા કેમેરામાં કેદ થયા હોવાનું સામે આવ્યું છે.

મળતી માહિતી મુજબ હુમલાખોરોએ પહેલાં મંત્રીની કારના ટાયરો પર ગોળીબાર કરીને વાહન રોક્યું હતું. ત્યારબાદ બંદૂકની અણીએ ફઝલ શકુર ખાનને કારમાંથી ઉતારી અજાણ્યા સ્થળે લઈ ગયા હતા. સોશિયલ મીડિયામાં વાયરલ થયેલા વીડિયોમાં નકાબધારીઓ રસ્તો રોકતા જોવા મળે છે. જોકે, અપહરણ પાછળ કયા સંગઠન કે જૂથનો હાથ છે અને તેની માંગ શું છે તે હજુ સ્પષ્ટ થયું નથી.

આ ઘટનાની સાથે પીટીઆઈના નેતા તથા પ્રાંતીય ધારાસભ્ય શકીલ અહેમદને પણ મલાકંદમાં અપહરણ કરવાનો પ્રયાસ થયો હોવાના અહેવાલો સામે આવ્યા છે. આ ઘટનાથી પક્ષના કાર્યકર્તાઓમાં ભારે રોષ ફેલાયો હતો. વિરોધમાં પીટીઆઈ કાર્યકર્તાઓએ મલાકંદના બટ ખૈલા બાયપાસ પર ચક્કાજામ કરી ટાયરો સળગાવ્યા અને ઉગ્ર સૂત્રોચ્ચાર કર્યા હતા.

ખૈબર પખ્તૂનખ્વાંના માહિતી મંત્રી શફી જાનેએ ઘટનાને બંધારણ, કાયદો અને જનતાના જનાદેશ પર સીધો હુમલો ગણાવ્યો છે. પીટીઆઈના વરિષ્ઠ નેતાઓએ જવાબદારી નક્કી કરવાની માંગ કરી છે. સાથે જ ચેતવણી આપવામાં આવી છે કે સ્થિતિ નહીં અટકે તો સમગ્ર પ્રાંતમાં વિરોધ પ્રદર્શનો વધુ ઉગ્ર બનાવવામાં આવશે.