તામિલનાડુના મુખ્ય પ્રધાન તરીકે વિજયના શપથગ્રહણ સમારોહમાં એક મહત્ત્વપૂર્ણ પ્રોટોકૉલનું પાલન કરવામાં આવ્યું હતું. જવાહરલાલ નેહરુ સ્ટેડિયમ ખાતે આયોજિત આ કાર્યક્રમમાં રાષ્ટ્રીય ગીત વંદે માતરમ્ તેના તમામ 6 પદો સાથે સંપૂર્ણ ગાવામાં આવ્યું હતું. જાન્યુઆરી 2026માં કેન્દ્ર સરકાર દ્વારા જાહેર કરવામાં આવેલી નવી માર્ગદર્શિકા મુજબ, જ્યારે રાષ્ટ્રીય ગીત અને રાષ્ટ્રગીત બંને એકસાથે વગાડવાનાં હોય ત્યારે વંદે માતરમ્ પ્રથમ ગાવાનું રહેશે. અગાઉ માત્ર પ્રથમ બે પદ ગાવાની પરંપરા હતી, પરંતુ હવે તમામ 6 પદ ગાવા ફરજિયાત કરવામાં આવ્યા છે.

શપથગ્રહણ સમારોહમાં આ નવા નિયમોનો અમલ કરતા સૌપ્રથમ રાષ્ટ્રીય ગીતનાં તમામ પદ ગાવામાં આવ્યા હતા, જે અંદાજે 3 મિનિટ 10 સેકન્ડ સુધી ચાલ્યા હતા. ત્યાર બાદ દેશનું રાષ્ટ્રગીત ‘જન ગણ મન’ રજૂ કરવામાં આવ્યું હતું અને તામિલનાડુની પરંપરા મુજબ અંતે રાજ્યગીત ‘તમિલ થાઈ વાઝથુ’ ગાવામાં આવ્યું હતું. વિજયના શપથગ્રહણ સમારોહમાં રાષ્ટ્રીય પ્રોટોકૉલના આ પાલને રાજકીય વર્તુળોમાં પણ ભારે ચર્ચા જગાવી છે.

આ સમારોહ દરમિયાન હાજર રહેલા તમામ મહાનુભાવો અને જનમેદનીએ રાષ્ટ્રીય પ્રતીકોના સન્માનમાં ઊભા થઈને શિષ્ટાચાર જાળવ્યો હતો. તામિલનાડુમાં નવી સરકારના આગમન સાથે જ રાષ્ટ્રીય પ્રોટોકૉલનો ચુસ્ત અમલ થતો જોવા મળ્યો હતો. મુખ્ય પ્રધાનના આ શપથવિધિમાં રાષ્ટ્રીય ગીત, રાષ્ટ્રગીત અને રાજ્યગીત એમ ત્રણેયની આચારસંહિતાનું વિશેષ ધ્યાન રાખવામાં આવ્યું હતું.