પંજાબના અમૃતસરથી બિહારના સહરસા જતી ગરીબ રથ એક્સપ્રેસ (ટ્રેન નંબર 12204) ટ્રેનમાં શનિવારે સવારે એક મોટી દુર્ઘટના થતા થતા રહી ગઈ છે. પંજાબના સરહિંદ રેલવે સ્ટેશન પર આ ટ્રેનના એક કોચમાં ભીષણ આગ ફાટી નીકળતા મુસાફરોમાં અફરાતફરી મચી ગઈ હતી. સવારે લગભગ 7:30 વાગ્યાની આ ઘટના હતી. આગની જાણ થતાં જ ડરી ગયેલા અને ગભરાયેલા મુસાફરો પોતાનો જીવ બચાવવા માટે ટ્રેનમાંથી કૂદીને ભાગ્યા હતા, જેને કારણે સ્ટેશન પર ભાગદોડ જેવી સ્થિતિ સર્જાઈ હતી. જોકે, આ ભીષણ આગ છતાં સદભાગ્યે કોઈ જાનહાનિના સમાચાર નથી.

આગ લાગવાની ઘટનાની જાણ થતાં જ રેલવે અધિકારીઓએ તુરંત કાર્યવાહી હાથ ધરી હતી. અધિકારીઓએ ઝડપથી પરિસ્થિતિ સંભાળીને ટ્રેનના જે કોચમાં આગ લાગી હતી, તે કોચના મુસાફરોને સલામતી માટે તાત્કાલિક અન્ય ડબ્બાઓમાં ખસેડી દીધા હતા. આ ઝડપી પ્રતિભાવને કારણે મોટી જાનહાનિ ટાળી શકાઈ. રેલવે મંત્રાલયે પણ આ ઘટનાની પુષ્ટિ કરી છે અને જણાવ્યું છે કે, "સરહિંદ સ્ટેશન પર શનિવારે સવારે ટ્રેન નંબર 12204 અમૃતસર-સહરસાના એક ડબ્બામાં આગ લાગી હતી. હાલમાં આગ પર સંપૂર્ણપણે કાબૂ મેળવી લેવાયો છે."

રેલવે અધિકારીઓની સતર્કતા અને ફાયર બ્રિગેડની મદદથી ટ્રેનના કોચમાં લાગેલી આગને ઝડપથી બુઝાવી દેવામાં આવી હતી. આગ પર કાબૂ મેળવ્યા બાદ રેલવેએ ખાતરી આપી છે કે ટ્રેનને ટૂંક સમયમાં જ તેના નિર્ધારિત ગંતવ્ય સ્થાન સહરસા તરફ રવાના કરવામાં આવશે. અધિકારીઓએ ભારપૂર્વક જણાવ્યું છે કે આ સમગ્ર ઘટનામાં કોઈ મુસાફરને ઈજા થઈ નથી. આ બનાવ ભારતીય રેલવેની સલામતી વ્યવસ્થા પર એક મોટો પ્રશ્નાર્થ ઊભો કરે છે, પરંતુ રેલવે દ્વારા સમયસર લેવાયેલા પગલાંની પ્રશંસા કરવામાં આવી રહી છે, જેના કારણે અનેક લોકોનો જીવ બચી શક્યો છે.