ઓડિશાના કેઓનજાહર જિલ્લાના દીયાનાલી ગામમાં એક હૃદયદ્રાવક કિસ્સો સામે આવ્યો છે. 50 વર્ષીય જીતુ મુંડા પોતાની મૃત બહેન કલરા મુંડાના બેન્ક ખાતામાં જમા થયેલા 19,300 રૂપિયા ઉપાડવા માટે મહિનાઓથી ગ્રામીણ બેન્કના ધક્કા ખાતા હતા. બેન્ક કર્મચારીઓ સતત બહેનના મૃત્યુના પુરાવા માંગી રહ્યા હતા અને તેમને હેરાન કરતા હતા. અંતે જટિલ વ્યવસ્થાથી કંટાળીને જીતુ મુંડાએ પોતાની બહેનનું હાડપિંજર જમીનમાંથી ખોદી કાઢ્યું અને તેને ખભે ઉચકીને બેન્ક પહોંચી ગયા હતા.

આ દ્રશ્ય જોઈને બેન્ક કર્મચારીઓ અને ત્યાં હાજર લોકો સ્તબ્ધ થઈ ગયા હતા. સોશિયલ મીડિયા પર આ વીડિયો વાયરલ થતા લોકોમાં ભારે રોષ જોવા મળ્યો હતો. પ્રશાસન અને બેન્કની જડ વ્યવસ્થા સામે સવાલો ઉઠતા અધિકારીઓ તાત્કાલિક હરકતમાં આવ્યા હતા. ગણતરીના કલાકોમાં જ એડિશનલ મામલતદાર સહિતના અધિકારીઓની ટીમ જીતુ મુંડાના ઘરે પહોંચી હતી અને તેને રકમ સોંપી હતી. આ ઘટનાએ સરકારી તંત્રની સંવેદનહીનતાનો ચહેરો ખુલ્લો પાડ્યો છે.