ભારત અને અમેરિકા વચ્ચે ચાલી રહેલા ટેરિફ વોર વચ્ચે ડોનાલ્ડ ટ્રમ્પના સૂર જાણે બદલાઇ રહ્યા હોય તેમ ભારતને અને ખાસ પીએમ મોદીને મિત્ર ગણાવી રહ્યા છે. તેઓ એસસીઓ સમિટની તસવીર શેર કરીને ચીન, રશિયા અને ભારતને લઇને જ નિવેદનો આપી રહ્યા છે. આ બધા વચ્ચે ટ્રમ્પે એવુ નિવેદન આપ્યુ છે કે એમ કહેવાનું મન થાય કે ટ્રમ્પ કરે છે શું ?

એક તરફ યુએસ રાષ્ટ્રપતિ ડોનાલ્ડ ટ્રમ્પ પીએમ નરેન્દ્ર મોદીને ખાસ મિત્ર કહેતા ક્યારેય થાકતા નથી, તો બીજી તરફ, તેમના નાણામંત્રીએ G-7 દેશોને ભારત અને ચીન પર ભારે ટેરિફ લાદવા કહ્યું છે કારણ કે આ બંને દેશો રશિયા પાસેથી મોટા પ્રમાણમાં તેલ ખરીદી રહ્યા છે. અમેરિકા દ્વારા જાહેર કરાયેલા એક નિવેદનમાં ભારત અને ચીનને યુક્રેનમાં મોસ્કોના યુદ્ધ પ્રયાસોના મુખ્ય સાથી ગણાવવામાં આવ્યા છે.

અહેવાલ મુજબ, રાષ્ટ્રપતિ ડોનાલ્ડ ટ્રમ્પ ઇચ્છે છે કે G7 દેશો ભારત અને ચીન પાસેથી રશિયન તેલની ખરીદી પર 50 થી 100 ટકા સુધીના ભારે ટેરિફ લાદે. શુક્રવારે G-7 નાણામંત્રીઓ સાથેની વાતચીત દરમિયાન યુએસ નાણામંત્રી સ્કોટ બેસન્ટ અને વેપાર પ્રતિનિધિ જેમ્સન ગ્રીરે તેમના સાથી દેશો પર વોશિંગ્ટનના ટેરિફ પગલાં અનુસાર પગલાં લેવા દબાણ કર્યું. તેમણે ચેતવણી આપી હતી કે ફક્ત રશિયાની ઉર્જા આવકમાં ઘટાડો કરવાથી જ યુદ્ધનો અંત આવી શકે છે.