શિરોમણી ગુરૂદ્વારા મેનેજમેન્ટ કમિટીને ફરી એક વખત 'ગોલ્ડન ટેમ્પલ'ને બોમ્બથી ઉડાવી દેવાની ધમકી મળી છે. ઈમેઈલ કરીને આ ધમકી આપવામાં આવી છે. છેલ્લા 20 કલાકમાં આ ધમકી બીજી વખત મળી છે. ત્યારબાદ ડોગ સ્કવોર્ડ સહિતની ટીમો દ્વારા તપાસ શરૂ કરવામાં આવી છે. ઉલ્લેખનીય છે કે ગઈકાલે રાત્રે પણ 'ગોલ્ડન ટેમ્પલ'ને બોમ્બથી ઉડાવી દેવાની ધમકી મળી હતી.

SGPCએ આ ગંભીર જોખમને જોતા પંજાબના મુખ્યપ્રધાનને પત્ર લખીને તાત્કાલિક તપાસ અને કડક કાર્યવાહી કરવાની માગ કરી છે. પોતાના પત્રમાં SGPCએ લખ્યું કે શ્રી અમૃતસર સાહિબની ઈમેઈલ આઈડી પર વધુ એક ઈમેઈલ મળ્યો છે. આ ઈમેઈલમાં કોઈએ સચ્ચખંડ શ્રી હરમંદિર સાહિબમાં RDX રાખવાના ષડયંત્રની જાણકારી આપી છે. SGPCએ પંજાબ સરકાર પાસે આગ્રહ રાખ્યો છે કે તે તાત્કાલિક આ સમગ્ર મામલાની ઉંડાણપૂર્વક તપાસ કરાવે અને ગુરૂદ્વારાની સુરક્ષા વ્યવસ્થાને વધુ મજબૂત બનાવે.