દિલ્હીના દક્ષિણ-પૂર્વ વિસ્તારમાં કાલકાજી મંદિર નજીક આસ્થા કુંજ પાર્કમાં 17 વર્ષની સગીરા સાથે સામૂહિક દુષ્કર્મની ઘટના સામે આવી છે. સોમવારે સાંજે 7:00 વાગ્યે સગીરા તેના મિત્ર સાથે કાલકાજી મંદિરે દર્શન કરવા ગઈ હતી. ત્યારબાદ બંને 7:30 વાગ્યે પાર્કમાં બેઠા હતા ત્યારે 25થી 30 વર્ષની વયના 3 શખ્સોએ પોતાને પોલીસકર્મી ગણાવી ધમકાવ્યા હતા.

આરોપીઓ પૈકી એકે સગીર છોકરાને પકડી રાખ્યો હતો, જ્યારે ત્રણેયે સગીરા પર સામૂહિક દુષ્કર્મ આચર્યું હતું. ત્યારબાદ ત્રણેય આરોપીઓ ફરાર થઈ ગયા હતા. રાત્રે પોણા 9 વાગ્યે પીસીઆર કોલ મળતાં પોલીસ પાર્કમાં પહોંચી હતી અને પીડિતાને તબીબી તપાસ માટે હોસ્પિટલ ખસેડી હતી.

દિલ્હી પોલીસે પોક્સો કાયદા અને બળાત્કારની સંબંધિત કલમો હેઠળ ગુનો નોંધી તપાસ શરૂ કરી હતી. સીસીટીવી ફૂટેજ અને તકનીકી દેખરેખના આધારે પોલીસે અમર કોલોની વિસ્તારમાં આરોપીઓની શોધખોળ હાથ ધરી હતી.

આ દરમિયાન પોલીસે કરેલા એન્કાઉન્ટર બાદ ગેંગરેપના મુખ્ય આરોપીઓમાં સામેલ આસિફને ઝડપી લીધો હતો. આસિફ ઓખલા મંડીમાં કામ કરતો હોવાનું સામે આવ્યું છે. દિલ્હી પોલીસ બાકીના 2 ફરાર આરોપીઓને પકડવા માટે સતત દરોડા પાડી રહી છે.