'તમામ 8 મંત્રી અને CMના સલાહકારને હટાવવા માંગ

જમ્મુ : જમ્મુ-કાશ્મીરમાં મુખ્યમંત્રી ઓમર અબ્દુલ્લાની સરકાર સામે તેમની જ પાર્ટી નેશનલ કોન્ફરન્સ (NC) ની અંદર ખુલ્લો બળવો જોવા મળી રહ્યો છે. પાર્ટીના આશરે 25 ધારાસભ્યોએ સરકાર વિરુદ્ધ મોર્ચો ખોલી દીધો છે અને ઉપમુખ્યમંત્રી સહિત તમામ 8 કેબિનેટ મંત્રીઓને 15 દિવસની અંદર હટાવીને મંત્રીમંડળનું સંપૂર્ણ પુનર્ગઠન કરવાની માંગણી કરી છે. આ સાથે જ ધારાસભ્યોએ મુખ્યમંત્રીના રાજકીય સલાહકાર નાસિર અસલમ વાનીને પણ પદ પરથી દૂર કરવા માટે ભારે દબાણ વધાર્યું છે.

આ બળવાખોર તેવર શુક્રવારે સાંજે પાર્ટીના ધારાસભ્ય કૈસર જમશેદ લોનના નિવાસસ્થાને મળેલી એક ગુપ્ત બેઠક દરમિયાન સામે આવ્યા હતા. પ્રાપ્ત માહિતી અનુસાર, આ બેઠકમાં 18 ધારાસભ્યો પ્રત્યક્ષ રીતે ઉપસ્થિત રહ્યા હતા જ્યારે 7 ધારાસભ્યો ઓનલાઈન માધ્યમથી જોડાયા હતા, જેથી બળવાખોર નેતાઓનો કુલ આંકડો 25 પર પહોંચ્યો છે.

આ બેઠક દરમિયાન ધારાસભ્યોએ સર્વાનુમતે એક પ્રસ્તાવ પસાર કર્યો છે, જેમાં પક્ષના વ્યાપક હિતનો સંદર્ભઆપીને આખું મંત્રીમંડળ બદલવાની અને વિભાગોની ફાળવણી પહેલાં પક્ષની અંદર લોકશાહી ધોરણે વ્યાપક વિચાર-વિમર્શ કરવાની માંગ કરાઈ છે. બેઠકમાં હાજર રહેલા ધારાસભ્યોએ આ પગલાંને પક્ષની અંદર આંતરિક લોકશાહી પુનઃસ્થાપિત કરવા માટેનું મહત્ત્વનું પગલું ગણાવ્યું છે. 90 સભ્યો ધરાવતી જમ્મુ-કાશ્મીર વિધાનસભામાં નેશનલ કોન્ફરન્સ પાસે 41 ધારાસભ્યો છે અને હાલ આ સરકાર કોંગ્રેસના ૬, અપક્ષના 6 અને માકપાના 1 ધારાસભ્યના સમર્થનથી ચાલી રહી છે. આવી સ્થિતિમાં પોતાની જ પાર્ટીના 25 ધારાસભ્યોની આ નારાજગી અને લામબંધીથી ઓમર અબ્દુલ્લા સરકારની સ્થિતિ પર સીધા સવાલો ઊભા થયા છે અને સરકાર સામે રાજકીય જોખમ તોળાઈ રહ્યું છે.