વૈશ્વિક બજારમાં વધેલી અનિશ્ચિતતાની સીધી અસર ભારતીય કોમોડિટી માર્કેટ (MCX) પર જોવા મળી છે. બજાર ખુલતાની સાથે જ સોના અને ચાંદીના ભાવમાં મોટો ઘટાડો નોંધાયો હતો. સોનાના ભાવમાં પ્રતિ 10 ગ્રામ ₹1,921નો જ્યારે ચાંદીના ભાવમાં પ્રતિ કિલોગ્રામ ₹5,387નો કડાકો નોંધાતા રોકાણકારો અને ગ્રાહકોમાં ભારે હલચલ જોવા મળી હતી.

આંકડા મુજબ, સોનાનો અગાઉનો બંધ ભાવ ₹143478 હતો, જ્યારે આજે તે ₹142633ના ભાવે ખુલ્યો હતો. ટ્રેડિંગ દરમિયાન સોનાનો ઉચ્ચતમ ભાવ ₹142633 અને નીચો ભાવ ₹141557 રહ્યો હતો. બીજી તરફ, ચાંદીનો અગાઉનો બંધ ભાવ ₹222664 હતો, જ્યારે બજાર ખુલતાં તેનો ભાવ ₹218648 રહ્યો હતો. સેશન દરમિયાન ચાંદીનો ઉચ્ચતમ ભાવ ₹218667 અને નીચો ભાવ ₹217277 નોંધાયો હતો.

નિષ્ણાતોના જણાવ્યા અનુસાર, સોના-ચાંદીમાં આવેલા આ અચાનક ઘટાડા પાછળ વૈશ્વિક પરિબળો જવાબદાર છે. ખાસ કરીને અમેરિકા અને ઈરાન વચ્ચે વધતા તણાવને કારણે આંતરરાષ્ટ્રીય કોમોડિટી અને એનર્જી બજારમાં અનિશ્ચિતતા વધી છે. ઉપરાંત, અમેરિકન ડોલરની મજબૂતી, વૈશ્વિક શેરબજારોમાં વધ-ઘટ અને મોટા રોકાણકારો દ્વારા થયેલી પ્રોફિટ બુકિંગના કારણે પણ કિંમતી ધાતુઓમાં ભારે વેચવાલી જોવા મળી હોવાનું બજાર નિષ્ણાતોએ જણાવ્યું છે.