તાજેતરમાં થયેલા સાઇબર હુમલામાં બૅન્ક ઑફ બરોડાના એક કર્મચારીનું ઈ-મેઇલ અકાઉન્ટ હૅક થતાં બૅન્કનો અંદાજે 1000 GB ડેટા લીક થયો હોવાનો મામલો સામે આવ્યો હતો. સોશિયલ મીડિયા પ્લેટફોર્મ X પર બૅન્કનો એક ટેરાબાઇટ ડેટા લીક થયાનો દાવો થયા બાદ આ ઘટનાએ વધુ ધ્યાન ખેંચ્યું હતું.

આ ઘટનાને ધ્યાનમાં રાખીને બૅન્કે સાવચેતીના ભાગરૂપે તમામ ગ્રાહકોને મોબાઇલ બૅન્કિંગ અને નેટ બૅન્કિંગના પાસવર્ડ તાત્કાલિક બદલવાની સલાહ આપી છે. ઉપરાંત તમામ બૅન્કિંગ વ્યવહારો માટે SMS અને ઈ-મેઇલ અલર્ટ સક્રિય રાખવા પણ જણાવ્યું છે.

બૅન્કે ગ્રાહકોને પોતાના નામે આવતા શંકાસ્પદ SMS અથવા ઈ-મેઇલમાં રહેલી કોઈપણ લિંક પર ક્લિક ન કરવાની ચેતવણી આપી છે. સાથે જ સમયાંતરે પોતાના નામે કોઈ ક્રેડિટ કાર્ડ અથવા લોન લેવામાં આવી છે કે નહીં તેની પણ ચકાસણી કરતા રહેવાની સલાહ આપવામાં આવી છે.