યુરોપમાં ચાલી રહેલી ભીષણ હીટવેવ વચ્ચે હવે અમેરિકા પણ ગંભીર ગરમીની લપેટમાં આવી ગયું છે. સ્થિતિ એટલી હદે વણસી ગઈ છે કે ઘણા શહેરોમાં સ્થાનિક વહીવટીતંત્રે લોકોના જીવ બચાવવા માટે ખાસ પ્રકારની વ્યવસ્થાઓ કરવી પડી રહી છે. રાષ્ટ્રીય હવામાન સેવા (NWS)ના જણાવ્યા અનુસાર, દેશના મધ્ય અને પૂર્વીય ભાગોમાં વાસ્તવિક તાપમાન 38 ડિગ્રી સેલ્સિયસથી ઉપર પહોંચી શકે છે, જ્યારે અતિશય ભેજને કારણે અનુભવાતું તાપમાન (હીટ ઇન્ડેક્સ) 46 ડિગ્રી સેલ્સિયસ સુધી જઈ શકે છે.

હાલમાં અમેરિકામાં 6 કરોડથી વધુ લોકો હીટ ઍલર્ટના દાયરામાં જીવી રહ્યા છે. હવામાન વિભાગે ચેતવણી આપી છે કે આગામી દિવસોમાં ઘણા શહેરોમાં વર્ષો જૂના તાપમાનના રેકોર્ડ તૂટી શકે છે. આ ભીષણ ગરમી 4 જુલાઈના સ્વતંત્રતા દિવસની રજાઓ સુધી ચાલુ રહેવાની આશંકા છે.

ગરમીથી બચવા માટે શહેરોમાં ખોલાયા સ્પેશિયલ 'કૂલિંગ સેન્ટર્સ'

અમેરિકાના મુખ્ય શહેરોમાં ગરમીનો સામનો કરવા માટે યુદ્ધના ધોરણે કામગીરી શરૂ કરવામાં આવી છે. શિકાગો વહીવટીતંત્રે પરિસ્થિતિને ગંભીરતાથી લઈને સમગ્ર શહેરમાં 'કૂલિંગ સેન્ટર્સ' (લોકોને ગરમીથી રાહત આપતા કેન્દ્રો) ખોલી દીધા છે. આ ઉપરાંત, વડીલો અને બીમાર લોકોની તબિયતની નિયમિત તપાસ કરવા માટે સરકારી કર્મચારીઓની વિશેષ ટીમો પણ તહેનાત કરવામાં આવી છે.

બીજી તરફ, ન્યૂયોર્કના મેયર જોહરાન મમદાનીએ પણ ગરમી સામે લડવા માટે એક ખાસ યોજના અમલમાં મૂકી છે, જેના અંતર્ગત લોકોને મફત પીવાનું પાણી પૂરું પાડવા માટે મોબાઈલ વાન ચલાવવામાં આવી રહી છે. શહેરમાં ઠેર-ઠેર હંગામી કૂલિંગ સ્ટેશનો બનાવવામાં આવ્યા છે, જ્યાં લોકોને તાત્કાલિક રાહત આપવા માટે મિસ્ટિંગ ફેન અને કૂલિંગ ટુવાલની વ્યવસ્થા કરવામાં આવી છે.

અમેરિકાની રાજધાની વોશિંગ્ટનમાં પણ ગુરુવારથી શનિવાર સુધી તાપમાન 38 ડિગ્રી સેલ્સિયસ સુધી પહોંચવાનું અનુમાન છે. ચિંતાની વાત એ છે કે આ જ સમયગાળા દરમિયાન અહીં દેશના 250મા સ્વતંત્રતા દિવસ નિમિત્તે ભવ્ય આતશબાજી અને ઉત્સવનું આયોજન થવાનું છે, જેના કારણે પ્રશાસન માટે ભીડને ગરમીથી બચાવવી એ મોટો પડકાર બની રહેશે.

આરોગ્ય એજન્સીઓએ નાગરિકોને બપોરના સમયે તડકામાં બહાર ન નીકળવા, પુષ્કળ પાણી પીવા અને હીટ સ્ટ્રોકના લક્ષણો પર સતત નજર રાખવાની કડક સલાહ આપી છે. અધિકારીઓએ ખાસ કરીને બાળકોને બંધ કારમાં ન છોડવા માટે તાકીદ કરી છે, કારણ કે આ વર્ષે અમેરિકામાં ગરમ કારની અંદર ગૂંગળામણને કારણે અત્યાર સુધીમાં 9 બાળકોના મોત થઈ ચૂક્યા છે.

આ ભીષણ ગરમીની સીધી અસર રમતગમત પર પણ જોવા મળી રહી છે. અમેરિકા, કેનેડા અને મેક્સિકોની યજમાનીમાં રમાઈ રહેલા ફીફા વર્લ્ડ કપ (FIFA World Cup)ના કેટલાક મુકાબલા અતિશય ગરમીમાં રમાઈ રહ્યા છે. મેચ દરમિયાન ઘણા ખેલાડીઓ અને દર્શકોને ગરમીના કારણે તબિયત લથડવાની સમસ્યાનો સામનો કરવો પડ્યો છે. આ પહેલા પણ ખરાબ હવામાન અને અસહ્ય ગરમીના કારણે એક મેચને અંદાજે બે કલાક સુધી રોકવી પડી હતી. હવામાન વિભાગનું માનવું છે કે આગામી થોડા દિવસો અમેરિકા માટે વધુ પડકારજનક સાબિત થઈ શકે છે.