કેન્દ્ર સરકારે 1 સપ્ટેમ્બર 2026થી અમલમાં આવે તે રીતે પેટ્રોલની નિકાસ પરનો વિન્ડફોલ ટેક્સ વધારીને 1.50 પ્રતિ લિટર કરી દીધો છે. આ સાથે ડીઝલની નિકાસ પરના શુલ્કમાં પણ 1નો વધારો કરાયો છે, જેથી તે 25 પ્રતિ લિટર થઈ ગયો છે. અગાઉ 15 ઓગસ્ટની સમીક્ષા દરમિયાન સરકારે પેટ્રોલની નિકાસ પરનો આ ટેક્સ ઘટાડીને શૂન્ય કરી દીધો હતો, જેમાં હવે ફરીથી વધારો ઝીંકાયો છે.

આ ટેક્સ ફેરફારો બાદ બુધવાર 2 સપ્ટેમ્બરે સરકારી ઓઇલ માર્કેટિંગ કંપનીઓ દ્વારા પેટ્રોલ અને ડીઝલના નવા દરો બહાર પાડવામાં આવ્યા છે. દિલ્હીમાં આજે 2 સપ્ટેમ્બરે 1 લિટર ઇથેનોલ વગરના પેટ્રોલની કિંમત 167.35 નોંધાઈ છે. આ ઉપરાંત દિલ્હીમાં અન્ય ઈંધણના ભાવ જોઈએ તો E5 પેટ્રોલનો ભાવ 109.24 અને E20 પેટ્રોલનો ભાવ 102.12 પ્રતિ લિટર નિર્ધારિત કરવામાં આવ્યો છે.

સરકારે સ્પષ્ટ કર્યું છે કે દેશમાં વપરાતા પેટ્રોલ અને ડીઝલ પરની એક્સાઇઝ ડ્યુટી યથાવત છે અને નવી જોગવાઈ માત્ર વિદેશી નિકાસ પર લાગુ થશે. વિન્ડફોલ ટેક્સ નિકાસ પર લાગતો હોવાથી ઘરેલુ બજારમાં બંને ઈંધણના સામાન્ય ભાવમાં કોઈ ફેરફાર થયો નથી. આ ટેક્સ વધારાને કારણે દેશના સામાન્ય ગ્રાહકોના ખિસ્સા પર કોઈપણ પ્રકારની માઠી અસર નહીં પડે.

બીજી તરફ મંગળવારે વિમાનના ઈંધણની નિકાસ પર ટેક્સ 50 પૈસા ઘટાડીને 19 પ્રતિ લિટર કરાયો છે. નવી સમીક્ષા મુજબ પેટ્રોલ પર લાગતો સંપૂર્ણ 1.50નો ટેક્સ SAED તરીકે લેવાશે. જ્યારે ડીઝલ પરના કુલ 25 શુલ્કમાંથી 24 SAED અને 1 રોડ એન્ડ ઇન્ફ્રા સેસ પેટે વસૂલવામાં આવશે. આ ઉપરાંત વિમાન ઈંધણ પરનો તમામ 19 ચાર્જ પણ SAED હેઠળ જ લાગુ પડશે.